無綫突推「限奶令」咪神「沒露」
無綫昨日內部發出「限奶令」，勒令女藝人在鏡頭前收起性感！通告指示以後拍強姦及床上戲要以意會形式交代，女藝人拍攝三點式或浸溫泉鏡頭更要外穿T-shirt！換言之咪神在螢幕前大騷Body的機會將大減，往事只能回味！
年前無綫劇集《巾幗梟雄之諜血長天》大玩重口味情節，男主角黎耀祥童年被雞姦，女主角胡杏兒亦多次遭強姦，需剪輯「潔淨版」才能在免費台播出，令TVB重新審視電視尺度！近年一再有劇集及綜藝節目「灑鹽花」，例如「咪神」高海寧在《賭城群英會》激晒豪乳；李佳芯在《踩過界》中飾演風騷法官，跟王浩信及張振朗分別有超激床戲；陳凱琳在《巨輪II》中險遭養父吳岱融強姦；張秀文在《同盟》中騷胸色誘對手。至於J2王牌旅遊節目《3日2夜》擺明以女藝人穿泳衣曬太陽或浸溫泉做賣點，陳庭欣、陳婉衡與張曦雯等曾在節目騷火辣身材！有見及此，昨日無綫內部發出通告實施「限奶令」，指示以後拍劇不應過分賣弄性感，強姦及床上戲要以意會形式交代，女藝人拍攝三點式或浸溫泉等鏡頭要外穿T-shirt！
強調有題材自由：只係含蓄啲
無綫副總經理（節目及製作）杜之克表示新守則主要是給創作與製作部門，並非要求藝員執行：「電視台主要係家庭觀眾，如果劇集中有強姦、性描寫場口，或者節目中有強調女性身材嘅鏡頭，我哋要好小心處理，但唔代表唔可以做，我哋係題材自由，只係要含蓄啲！」通告內容亦提到女藝員出外拍攝時要有女工作人員同行，如有藝員遇到不被尊重經歷可向公司投訴，問到杜之克是否有女藝員「出過事」？他說：「冇！依家好多時好少人手，如果只係一個女藝員出差，其他係男工作人員，生活細節上確有不方便，我哋考慮到藝員需要啫！」
對於突然而來的「限奶令」，多位曾拍攝性感場面的女藝人均表贊成。新加坡視后李佳芯直言對她影響不大：「我拍劇有少少性感戲，但都係有限度，冇露幾多吋事業線，我覺得新例冇壞嘅，演員唔一定要賣弄性感！每個女演員都有好多可能性，女藝人保護自己係好緊要。」高海寧同樣表示贊成，認為一套劇除了女性身材，尚有其他吸引之處：「拍劇係想大家睇到我哋嘅演技同準備工夫，我個人立場係開心，公司製作亦愈來愈用心。」張秀文則表示《同》劇的色誘戲是以喜劇誇張手法表達，完全沒有色情成分，又笑言要「避風頭」，台慶或會穿旗袍密實亮相。擁豐滿身材的陳偉琪在劇集《誇世代》中有場倒瀉香檳的性感演出，她昨日出席電影優先場時被問到是否不需再性感演出？她說：「唔知喎！其實做演員好被動，服飾造型唔係自己決定。（活動都冇得性感？）呢樣冇收到。」又坦言只是角色需要，覺得電視尺度性感有限。
花旦齊讚好 王君馨面臨刪戲
陳凱琳昨日出席活動時指每個人對性感的定義不同，相信監製會有專業決定。講到《巨》劇的強姦戲，她認為是劇情需要：「係講個女因為咁怕咗爸爸，扭轉咗關係，收到劇本嗰陣已經知，亦溝通好應該點做。」王君馨昨日返電視城拍攝新劇《是咁的，法官閣下》，自言有場泳裝戲仍未拍攝，未知劇本會否修改：「咁我喺劇中嘅性感又唔係好誇張，都係同黃智賢及關禮傑嘅感情戲，唔係太性感。」
此外，幾位無綫監製均歡迎新指引，《誇》劇監製陳維冠說：「我從來唔用呢啲做賣點，好似第一集陳偉琪性感演出只係凸顯陳豪性格，話支香檳好貴，同張枱打完蠟，係個笑位。」林志華表示新劇《兄弟》沒有刻意賣弄性感的場口，全部因應劇情需要拍攝。王心慰亦贊同TVB做法，表示電視尺度應以意識交代，葉鎮輝則指一直知道強姦及床戲都是點到即止。
文：影視組