【同盟】陳展鵬鐵漢有柔情 感激單文柔:呢半年同佢一齊共患難|香港01|即時娛樂

【同盟】陳展鵬鐵漢有柔情 感激單文柔:呢半年同佢一齊共患難

撰文:
最後更新日期:

記得《同盟》出街初期,男主角陳展鵬曾開口,希望傳媒能夠高抬貴手,集中討論劇集內容,不欲再談緋聞女友單文柔及私生活。期間還有鮑起靜提起陳展鵬承認戀情所帶來的誤會,傳媒、觀眾聽到「陳展鵬」這名字,離不開他與單文柔之間的緋聞。事隔兩星期,終於,陳展鵬陸續在各大訪問講起與單文柔的感情,他欣賞對方半年間有勇氣面對,也覺得單文柔有不少優點,隨時間認識,陳展鵬希望彼此能夠低調地、健康地進一步了解對方。

攝影:梁碧玲

陳展鵬近來開腔講起感情事。

陳展鵬捱足20多年,去年終於得到視帝。不過,當大眾在視帝話題後,發掘到他與單文柔的緋聞,又有不停的追訪。陳展鵬坦認最初處理手法未夠好:「唔會覺得唔公平,做呢一行個配套就係咁,但係我做咗咁耐,真係未試過有咁多緋聞喺呢段時間出現。我會問自己喺處理同應對方法係咪缺乏咗呢?因為呢啲問題係會必然發生,我盡量都想將問題同對身邊人嘅影響減到最輕。」陳展鵬明白總不能要他人跟足自己一套:「既然我都舉咗手嘅時候,都繼續發生,其實都改變唔到,嗰個時候唔好理對或錯。」他又有反思過,甚至往有的方面想,報導的出現源於有市場價值。就算無辦法再改變,陳展鵬認為有些事已經過去,現在會盡所能去協調和配合媒體。只希望他在私人生活方面有多點空間:「始終做藝人,都唔一定要挖埋啲腸畀你睇。」但他強調與媒體關係絕對有商有量:「我所做嘅嘢又唔係犯法,惟有將來再做、處理得好啲。」

陳展鵬大讚單文柔是好女仔。

+4
+4
+4

如是者,陳展鵬最近不忌諱,公開講起緋聞對象單文柔。雖然他多次講到彼此處於了解階後,但言談間感受到陳展鵬對單文柔感覺良好。「我同佢(單文柔)嘅認識係源於講起時裝,咁啱我喺呢方面都唔係好叻,而佢又有呢方面嘅研究,就會傾好多關於呢方面嘅嘢,一齊交流下意見。」打開話題匣子後,陳展鵬用了多個形容詞稱讚對方:「佢好好,係一個心地善良嘅女仔,好有自己嘅諗法。」而單文柔最重要,最吸引到陳展鵬的地方,就是懂得人情世故:「佢好有家庭觀念,對家人或者老人家都好好,呢一樣我相信都好能夠吸外到大家。」

陳展鵬以OK兩個英文字概括兩人關係,但半年來被追訪期間,他說:「其實呢半年,都叫做同佢一齊共患難嘅。作為一個新人,就要面對咁多嘢,我好欣賞佢有咁樣嘅耐力,因為都係嗰句,一個新人已經處理得好好。」不過展鵬講笑話:「最近我覺得佢好似有妄想症,佢覺得自己被人跟,人哋拎住個電話就以為係影佢。」他覺得單文柔太精神緊張,要靠個人意志放鬆,當然陳展鵬都會嘗試開解她。

陳展鵬與胡定欣的緋聞可以暫告一段落。

陳展鵬認為與單文柔的共同點是低調,所以未來日子,希望能夠謹慎、穩定地認識對方:「都係要時間了解,始終我都想拍拖嘅對象,係可以結到婚,呢段時間可以認清楚。人係好得意,有時識咗好耐,但緣份未到未撻著;又有啲人一嚟就好有Feel,但因為好多原因唔可以一齊。我20歲個時都好想結婚,其實係都市病嚟㗎,好多人想結婚都結唔到。但經過今次之後,唔好話保護喇,都會有唔同嘅顧慮,要好好處理。」目前為止,陳展鵬最想事情舒服地發展,慢慢地淡開,因為再討論下去,「我驚觀眾對陳展鵬會厭!」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。