陳卓賢新歌談異地戀延續愛的故事 到英國巡唱落機即拍攝MV：Jet lag幾辛苦 欲寫信回饋粉絲愛意 Ian陳卓賢今日推出今年第二首單曲《Thank You Postman》，正係延續上一首作品《Lost at first sight》嘅故事發展，講述一對情侶各自追逐自己嘅夢想，無奈分隔兩地，但心靈上依然形影不離，憑藉寫信俾對方聯繫感情。 Ian趁早前去英國舉行MIRROR巡唱時，趁出空檔喺倫敦拍新歌MV，抵達當日即立即投入拍攝，佢坦言有啲吃力，「第一次嚟倫敦，一落機就拍攝，因為Jet lag都幾辛苦，呢種感覺令我諗返起當日拍攝《正式開始》MV，又係拍完劇就飛通宵機去日本，又係去到機場就即刻開始拍，係好攰，而家喚醒咗當時嘅記憶。」Ian更搞笑話：「唔得喇，好攰！我而家已經想瞓覺。」 剛好Ian身處英國，扮演女友嘅Natalie許恩怡喺香港，二人各自分開拍攝，香港及倫敦穿插於MV畫面之中，直截了當表達咗兩人分隔異地嘅關係。 談到故事中有寫信情節，Ian話自己一向唔係一個好擅長用言語去表達自己嘅一個人，以前都有寫信俾人，問到身在英國巡唱時，若要寄出一封信，寵粉嘅Ian話要選擇寄俾Hellosss，「希望你哋都接收到呢封信，雖然我而家唔喺香港，但都收到你哋對我嘅支持，呢封信係回饋返呢份愛俾你哋。」 問到旅程中有冇尋找創作靈感？Ian話：「又好少去尋找，有陣時係突然有啲嘢出咗嚟，多過主動去尋找。我搭飛機多數唔係好瞓到覺，所以反而係喺飛機上面，我都有寫到一首歌出嚟。」至於今年呢個音樂系列會有幾多章節，Ian大賣關子，以《哈利波特》作比喻，「如果一早知道幾多集，就大概知道劇情點樣發展，但我想大家一路追一路期待會好啲。」 Follow埋IG同Facebook page呀👇🏻 _ ►訂閱 Viu1HK YouTube Channel: https://bit.ly/3lYFNLW ►追蹤 Viu1HK Instagram: https://www.instagram.com/viu1hk/ ►讚好 Viu1HK Facebook page: https://www.facebook.com/Viu1HK/ ►觀看更多精彩內容：https://www.viu.com #陳卓賢 #Ian #MIRROR #Thank You Postman #英國 #Natalie #許恩怡 #Viu1HK #Viu1娛樂新聞 #Viu1 #Viu #Viu煲劇平台