【明報專訊】「你嗌嘅嘢食到埗喇」、「食得開心啲」，呢兩句說話係嚟自立法會餐廳近日試用嘅兩部送餐機械人「立仔」同「立女」。立法會主席梁君彥噚日喺facebook專頁介紹兩部送餐機械人時話，香港飲食業鬧人手荒，立法會餐廳都不能倖免，希望可以幫輕餐廳員工。佢話「立仔」同「立女」體形輕巧，行動靈敏，送餐快穩準，仲得到唔少食客歡心。
「立仔」同「立女」除咗送餐，仲要兼任STEAM教育宣傳大使，梁君彥噚日就介紹佢哋畀一班到訪嘅同學認識，話同學好雀躍，跟住同圍住機械人，成為小粉絲。佢又話，同學喺其他餐廳，就算見到送餐機械人都好難有機會了解實際操作，推薦教師帶同學參觀立法會時到餐廳一遊，聽導賞員富趣味嘅介紹，近距離認識機械人操作，引發同學仔對創科嘅興趣。
「立仔」同「立女」係來自一間喺2019年成立、由香港科技園培育嘅機械人科技公司，機械人應用咗人工智能、IoT（物聯網）及5G等技術。