阿仙奴1日內放走3件　淺野拓磨賣去邊？

阿仙奴用破球會紀錄7,200萬鎊簽入尼高拉斯比比後，當然要進行「散貨」行動，過去1日內就靜靜完成3宗賣人交易，包括日本前鋒淺野拓磨、波蘭中堅基斯甸比歷同尼日利亞中場安華卡利。

24歲日本前鋒淺野拓磨加盟阿仙奴3年以來，不斷被外借去德國比賽，1場都冇為阿仙奴上陣，結果依家正式轉投塞爾維亞勁旅柏迪遜，轉會費為100萬鎊。另一小將安華卡利命運亦好類似，21歲嘅佢同樣係經歷3年外借生涯，據報日前獲批准免費轉會西甲侯爾斯卡，阿仙奴只係要求日後轉會分帳。

至於波蘭21歲新星基斯甸比歷，周五(2號)落實加盟英冠球會打比郡，轉會費就達到1,000萬鎊，呢位小將加盟阿仙奴4年只係踢過2場盃賽，不過上季外借查爾頓表現出色，夏天嘅U21歐國盃亦鋒芒畢露，自然有唔少市場，佢亦係阿仙奴今夏賣出最貴嘅球員，真係估你唔到。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。