而家喺香港乜都貴，好似好難儲到錢，所以要慳錢就要從日常生活中嘅小習慣入手，所謂「積少成多」，就算你每日只係一蚊兩蚊咁慳，但經過一段日子之後，總會慳咗一嚿錢出嚟。等我哋首先為大家分享18個慳錢大法！各位CG!，為咗慳錢，你又可以去到幾盡？
1.自製早餐：例如買一pack幾塊嘅方包分幾日食，自行搽上鍾意嘅果jam或加配料等等。
2.帶lunch box：晏晝出街食飯閒閒地最少都四、五十蚊，帶飯一個星期已經可以慳到成200蚊。
3.妙用信用卡：雖然信用卡係好易令人「使大咗」，但如果你用得精明，分分鐘幫你慳唔少架，不妨留意下各款信用卡嘅迎新優惠呀！
4.少買零食：如果你有周不時去掃一大堆零食嘅習慣，就要改喇！零食食得多無益又致肥，不如買少啲，慳返啲錢。如果真係想食零食的話，都要食得健康，可以參考以下文章：做個健康零食達人！
5.善用港鐵$2優惠：如果公司/屋企附近有港鐵嘅$2優惠機，不妨加以善用，行多兩步去拍一拍卡，每日慳$2，一個月都慳到約$40架。
6.多行路：如果體力同時間許可，路程又唔算遠的話（例如一個港鐵站嘅距離），不妨以行路代替搭車，既慳錢又可當做運動。
7.儲分優惠：善用八達通、信用卡或一啲商店嘅會員卡去儲積分，有機會免費換到現金券或禮品。
8.DIY美甲：出去整指甲係好靚，不過就比較貴。而家市面上推出咗好多自家美甲嘅產品，如美甲貼、特別效果嘅甲油等，慳錢又好玩。
9.減價入手：睇準減價時段先去掃貨，只要忍得手，你嘅心水貨品分分鐘可以平一半有多！當然咁樣做有搶唔到自己心水貨品嘅風險，你要自己衡量吓喇！
10.mix & match：可以買多少少basic淨色或長青款式嘅衫褲，利用mix & match方法去配搭多個唔同嘅造型。
11.出街自備清水：可以減少喺街買飲品嘅機會。
12.放工/放學返屋企：盡量控制自己放工/放學唔好喺街「閒逛」，因為好多時使大咗都係因為「唔小心」買咗嘢。
13.減少睇戲：有啲類型嘅戲唔一定要喺戲院睇先有好好嘅效果（例如愛情片），不妨忍一忍，等出碟再睇都未遲。
14.記低每日消費：搵本簿寫低每日自己嘅消費，你就會發現啲錢用咗喺邊，有無用喺一啲無謂嘢身上。
15.自己染髮：頭髮生長速度快，成日要去salon染髮真係好貴，不妨自行買染髮產品喺屋企染。
16.美容產品用完先買：雖然女生都係鍾意試新產品，不過為咗慳錢，大家都係用晒先好再買新嘅產品，否則越買越多又用唔晒的話，就係浪費金錢&浪費埋地球資源啊！
17.試咗先買：護膚品/化妝品真係人夾人，唔好見人話好用就衝去買，建議去counter拎咗sample試吓先，覺得啱用先買貨size。
18. 控制使錢速度：開兩個銀行戶口，每個月出糧時將一筆要儲嘅錢過落另一個不動產嘅戶口，淨返嗰啲就任自己用，咁樣會較容易控制自己嘅使錢速度。
如果你都有好提議，不妨都同大家開心share啊！
登入 瀏覽本網站，可獲取積分換領專屬優惠
點擊查看專屬優惠