鬼同你住｜長洲東堤小築「兩球」有找 敢唔敢博?

位於長洲的東堤小築依旁在水清沙幼的東灣泳灘，原本環境心曠神怡，一向是渡假消閒好地方。不過自亞洲金融風暴及沙士爆發後，該處變成「燒炭勝地」，聲名大噪。不單自殺多，兇殺案亦多，近日再有54歲女倒斃東堤內，令樓價大插水。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示

不過，在瘋狂樓市下，即使是中國人忌諱「凶宅」區，亦有人承接，東堤小築過去樓價可以升幾多？而家價錢是否仍好抵？

東堤凶宅只售94萬元？

多年前網上曾流傳一張樓盤廣告，是一個東堤小築凶宅，實用面積為315平方呎，以低於市價的94萬元開價，廣告內更大字標題寫上「巨房巨廳，點死都得」作招徠，引起網上曾一陣熱議。

如果夠膽在2015年，以94萬元買入東堤315方呎單位，於去年11月同面積單位以140萬元賣出，呎價4,444元，單位升值49%，而同期中原城市領先指數只升33%，升幅都跑贏整體大市。

東堤樓價可升7倍

如果於樓市低潮買入，東堤可以賺幾多？以去年10月東堤小築1期6座低層D室成交個案為例，以173萬元賣出，實用面積350平方呎，呎價4942.8元。原業主於2004年沙士後以21萬元買入，帳面獲利152萬，持貨17年，勁賺約7.2倍。

所以，在樓市上升周期，雞犬皆升情況下，連東堤小築亦漲價，但即使有升勢，但東堤小築整體價格仍較市區低水，價錢仍好平，一來因為交通問題，其次是事故盤多，如果樓市轉勢向下，東堤樓價亦要下插，而且更難易手。