諸葛攬Regen剃法拉眼眉

與薛世恒拍拖多年的陳法拉，早前被指不滿組合HotCha成員Regen常趁陳法拉開工時，頻頻約會其男友吃飯，遂一怒以「老闆娘」身份發功棒打，令Regen即時事業戀情「雙失」，有指Regen被打入冷宮，投閒置散少工作之餘，法拉更不准男友再跟女方見面。

與大嫂唱反調

雖然傳出法拉下令雪藏Regen，可是將和名模諸葛梓岐結婚的二少薛嘉麟，卻和「大嫂」法拉大唱反調，據知今年反而會力捧HotCha，令Regen隨即「翻生」！

其實大少爺薛世恒已一早脫離Neway，在二少薛嘉麟主理下，先後簽下鄭融、張智霖及鍾嘉欣等歌手加盟，更計劃今年斥資七位數字重組HotCha，稍後會搞大型招募活動吸納新面孔，借此挑選新成員加入HotCha，打造如韓國著名組合少女時代般的全女子組合。

法拉和諸葛梓岐屢傳不和，最近雖然「法葛」局勢平靜，諸葛近日出席活動時，更多次否認不和之說，擺明是一家親姿態。不過，隨着法拉向Regen開火，薛嘉麟反而唱反調力捧，身為薛家準新抱的諸葛梓岐當然會力撐夫婿，料「法葛」兩妯娌關係又掀起火頭！

記者向薛嘉麟查詢HotCha重組大搞一事，薛嘉麟承認有此計劃，對於長兄薛世恒和Regen的緋聞，他說：「根本係誤會，只係一則得啖笑嘅傳聞，公司一直都有投資力谷旗下歌手。（擔心同Regen傳緋聞所以力谷HotCha？）依家公司係捧HotCha，唔係捧佢個人發展，我公司咁多歌手，我哋個個都重視，張智霖都係我哋旗下，唔通又傳我同張智霖有嘢？」

Regen有諸葛撐腰，逃出雪櫃。

陳法拉埋怨男友薛世恒趁她開工時密會Regen。

最緊要賺到錢

身為準老闆娘的諸葛梓岐，對於男友「唱反調」斥資力捧HotCha，諸葛直言：「吓？呢啲係男朋友公司嘅嘢，公私分明，我真係唔知喎。（之前Regen同薛世恒傳緋聞，怕唔怕今次會輪到你男友？）最緊要係佢賺到錢，況且我一向對佢有信心嘛！」

另外，有報道指諸葛為免婚事有變卦，故一改和法拉不和的作風並頻頻示好，她說：「雜誌作古仔係好正常，我只會當笑話咁睇！我同法拉一向都冇嘢。」另外，昨日記者發現諸葛和助手風騷行街，心情不俗。

諸葛為籌備婚禮，近日頻頻出動掃貨。

諸葛心情靚絕，與助手「濕平」。

文：名人組　攝：追蹤組