《輕．功》插曲惹網民熱議　神秘女聲原來係佢？

無綫新劇《輕．功》現正熱播，其中龔慈恩飾演嘅「繆妙」臨死前於天台盪鞦韆圓夢一幕，搞喊唔少網民，當時配上全新翻唱嘅經典金曲《飄》亦引起熱烈討論，大讚新版本好聽有感情，而翻唱者身份終於曝光，原來係無綫藝人、同樣有份演出該劇嘅麥皓兒，佢喺社交網開估：「多謝監製聲哥給予的機會，榮幸能翻唱《飄》一曲，喺《輕功》一劇中不同的場口，以及祥哥與龔姐這場感人熱淚的一幕中呈現出來！」

網民都笑指估唔到原來佢咁唱得，其實麥皓兒向來有教學生唱歌，最近更推出首支單曲《愛就愛》及同名專輯，正式以歌手身份加入樂壇做女新人，日前佢仲與音樂人張佳添孖住現身薛家燕主持嘅電台節目大談新歌，分享終於圓夢做歌手嘅心路歷程。