最鍾意食炸物,但要炸得乾身、食材熟度啱啱好,係一件唔易嘅事!葵芳金子半之助日式餐廳令我大開眼界,雖然等上餐時間唔快,但覺得好值得等,因為實在太好味!今次揀咗上天丼和車海老軟殼蟹天丼,見到炸物又高又多,遮哂所有飯,真係忍唔住打卡。 餐廳空間頗大,配合開放式廚房,可以睇大廚點處理炸物!而且座位之間都夠闊落,出入無咩問題,加上每枱都...有膠板隔住,私隱度夠高。 套餐仲有漬物(醃蘿蔔及薑片),超開胃;另外仲有味噌湯,唔咸又夠熱;店員仲遞上黑豆麥茶,茶葉濃又唔苦,口感厚醇。 上天丼 HKD 118 食材包括車海老、白新魚、小柱魷魚天婦羅餅、海苔、莢豌豆同溫泉蛋! 白新魚魚味幾足,肉質好滑又夠厚肉,外脆內滑,好特別! 整體炸物都係炸得乾身、無「油益味」;而且炸物好薄身,好足料! 車海老軟殼蟹天丼 HKD 168 材料好豐富,覺得呢個價錢真心抵食!食材包括車海老、軟殼蟹、小柱魷魚餅、莢豌豆、海苔,仲有隻溫泉蛋。 篤穿溫泉蛋再撈埋飯食,識食一定咁食。 先食車海老,蝦勁長又厚肉,肉質緊緻又彈牙,炸蝦無咩可以挑剔; 軟殼蟹好厚肉又有蟹膏,食落外脆內軟滑,鮮味、蟹味濃郁; 最覺得特別係小柱魷魚餅,估唔到咁厚肉嘅魷魚,肉質咁滑又彈牙,熟度拿捏得太好啦! 成碗丼炸物口感層次多,乾身又唔油膩。 而且飯粒好軟彈又惹味,因為碗底有天婦羅秘傳醬汁,撈飯惹味又唔咸,令人食唔停!更多