平時提到「重陽節」,可能你只會諗起又多一日公眾假期。或者一家大細不論老幼都會約定重陽拜山,慎終追遠。但你又有冇諗過重陽節點解叫重陽節呢?點解一定要係重陽節登高?重陽節同清明節有冇咩關係?今次新世紀協會就同大家分享一下重陽節的由來、重陽節食品、重陽節習俗、重陽節活動、重陽節的意義喇!
重陽節又名「重九節」、「踏秋節」、「敬老節」。點解叫重九節?因為每年農曆九月九日就係重陽節,二九相重,所以又叫「九九」、「重九」。根據儒家陰陽觀,認為數字六係陰、九係陽。所以「重九」,又叫做重陽。中國歷史上並冇明確記載到重陽節同飲菊花酒、登高等重陽節習俗嘅關係。只有少部份古代文獻記載戰國時代開始有登高同飲菊花酒嘅重陽節風俗。
如果講到重陽節正式變成一個節日,就要講到去西漢時期。漢西漢學者劉歆嘅《西京雜記》就記載,漢高祖劉邦嘅愛妾戚夫人俾呂后害死後,就連佢嘅侍女賈佩蘭都不能倖免,俾人驅逐出宮。離宮後,賈佩蘭嫁咗俾扶風人段儒。佢閒談時曾經提到她在宮廷時,每年九月九日帶茱萸,食蓬餌(即係「重陽糕」),飲菊花酒,以辟邪延壽。可見當時已經形成重陽節呢個節日,會有固定日子同方法慶祝。
要數最為膾炙人口嘅重陽節的故事 ,就莫過於桓景登高。南朝梁人吳均寫到,東漢有位仙人費長房警告佢嘅弟子桓景,九月九日當日全村將會有災難。如果要避禍擋災,就要帶全家大小上山。而且每個人都要帶紅袋,裡面裝住茱萸,掛在手臂上,仲要多飲菊花酒。傍晚落山時,佢哋發現所有留喺屋企嘅家禽家畜全都死光。呢個重陽節故事,後來就變成家傳戶曉嘅重陽登高避災故事。
由此可見,當時嘅人唔係慶祝重陽節。反之,大家一到重陽節,就要登高同帶茱萸辟邪。對佢哋嚟講,只有離家躲災,飲菊花酒,先可以驅除瘟疫,延長壽命。
重陽糕又名「菊糕」、「花糕」。源自飲食風俗「嘗新」,喺秋糧收割後就將剛熟嘅稻穗割下,曝曬稻穗後就會舂成新米。將佢煮成米飯後就會點上香燭,供奉祖先,便全家享用。重陽糕係以麵粉、米粉(江米和黃米)、小米和豆等為原料,再加上棗蒸制而成。
點解重陽要食重陽糕?就係因為貪佢個名好意頭!「糕」與「高」同音,正取佢嘅寓意 -- 步步高陞、前途光明。由唐朝起,重陽糕上要用竹籤插重陽旗。呢種小旗係以五色紙縷為花紋,中間有「令」一字,又係為了討個吉慶嘅好意頭!
自古以嚟,重陽節、菊花都係一眾文人取材對象。一般寫文人重陽節 嘅時候遊玩、或身處在外嘅思鄉情緒。
《九月九日憶山東兄弟》王維 (唐)
獨在異鄉為異客,每逢佳節倍思親,
遙知兄弟登高處,遍插茱萸少一人。
《九日登李明府北樓》劉長卿(唐)
九月登高望,蒼蒼遠樹低;
人煙湖草裡,山翠現樓西。
《九日登玄武山旅眺》邵大震(唐)
九月九日望遙空,秋水秋天生夕風;
寒雁一向南飛遠,遊人幾度菊花叢。
《醉花陰》李清照 (宋)
薄霧濃雲愁永晝,端老銷金獸。佳節又重陽,玉枕紗櫥,半夜涼初透。
東籬把酒黃昏後,有暗香盈袖。莫道不銷魂,簾捲西風,人比黃花瘦!