【即時戰報】報晒仇！熱刺爆廠繼續追車
20170430
東網電視
更多新聞短片
唔經唔覺，英超已經進入爭標直路，周日一眾列強齊齊出擊。先有曼聯7點打頭陣，主場對護級份子史雲斯，之後9點又有愛華頓主場大戰車路士，呢場比賽賽果會直接影響到前列形勢，真係唔可以錯過呀！
尾場仲有2哥熱刺喺白鹿徑，同阿仙奴上演「北倫敦打吡」；主隊要贏波「追車」，兵工廠亦要繼續爭前4，「前4 Mode」一開都唔講得笑。兩隊互撼一向都特別璀璨，各位讀者梗係追實《東網》今晚帶畀你嘅「英超即時戰報」啦！
【01:23】 熱刺 2:0 阿仙奴 全場完
熱刺最後以2:0爆廠，繼續同榜首車仔維持住4分距離。至於阿仙奴就大鑊喇，今季排名肯定唔及死敵熱刺之餘，雖然有兩場喺手，但係仲落後緊雙曼5至6分，想入前4唔容易呀！
【01:15】
阿仙奴唔係冇嘗試，但係把握唔到機會都幾弊，後備入替嘅禾確特射門冇乜威脅，考唔起洛里斯。
【01:07】
兩隊係世紀死敵，熱刺又點會畀阿仙奴好過？不過，槍手門神施治連番撲救，幫兵工廠守住大門。
【00:56】
熱刺殺得性起，就連後防維頓漢遠射都似模似樣！不過，施治唔怕你遠射，再次救出勁射。A山手球又冇吹到，如果唔係阿仙奴就堅大鑊了！
【00:46】 熱刺 2:0 阿仙奴
卡尼被槍手後防踢跌，自己操刀冇甩拖，2分鐘入2球，阿仙奴大鑊了！卡尼多得呢個12碼，以6球成為對阿仙奴最多入波嘅熱刺球員，之前係依家踢緊皇家馬德里嘅加里夫巴利，舊記錄係5球。
【00:44】 熱刺 1:0 阿仙奴
卡尼、艾歷臣同阿里，3個人夾埋玩殘兵工廠後防，艾歷臣射門雖然被擋到，但係阿里快步補射得手！
【00:37】
熱刺換邊後好快就有機會，雲耶馬一記撞射，畀施治托走，之後角球孫興民近射射出界。
【00:18】 熱刺 0:0 阿仙奴 半場完
半場雙方無紀錄，熱刺喺上半場中段都比較多攻勢，不過返更衣室前客隊都有幾次進攻，其中山齊士算最近磅。
【00:13】
阿仙奴喺完半場前有個角球機會，山齊士接應隊友短傳之後，喺右邊嚟個冷箭一Chok，差啲就畀佢搞掂！
【23:55】
熱刺連環失機！孫興民快攻擺脫對手，殺入禁區傳波被擋，艾歷臣執漏射中楣頂，呢個moment先嚟放生死敵？
【23:52】
哈利卡尼沉底傳中，可惜迪利阿里只係揩到！阿里失機之後都十分後悔，趴喺地唔想起身咁。
【23:49】
比賽過咗20分鐘，擁有主場之利嘅熱刺比較多攻勢，不過就唔多銳利。阿仙奴亦受制於對手壓迫性打法，進攻都唔算暢順。
【23:41】
開波冇耐雙方都好快入局，熱刺好早已經有哈利卡尼埋門不果，阿仙奴亦有基蘭傑比斯畀洛里斯撲跌，但係呢位法國門將撲到波先，所以冇12碼。
【23:10】 熱刺 對 阿仙奴
今晚英超壓軸大戰北倫敦打吡，熱刺主場鬥阿仙奴。今場係熱刺喺白鹿徑球場最後一次出戰北倫敦打吡，賽前有輕傷嘅雲耶馬趕及披甲，不過另一防中迪比利就暫時做後備，另外捷比亞亦取代基爾獲加正選上陣。阿仙奴方面繼續打3個後衞，哥斯尼無恙可正選上陣，阿歷士張伯倫同基蘭基比斯擔任兩邊翼衞角色，中場由艾朗藍斯及格拉沙加擔正。
熱刺正選陣容
門將：1洛里斯
後衞：16捷比亞、5維頓漢、4艾達韋列特、33賓戴維斯
中場：15艾歷迪亞、12雲耶馬、20迪利阿里
前鋒：7孫興民、10 哈利卡尼、23基斯甸艾歷臣
阿仙奴正選陣容
門將：33施治
後衞：5基比爾包列斯達、6哥斯尼、18蒙利爾
中場：15阿歷士張伯倫、29格列沙加、8艾朗藍斯、3基蘭基比斯
前鋒：11奧斯爾、12基奧特、7阿歷斯山齊士
【22:58】 米杜士堡 2:2 曼城 全場完
曼城最後以2:2逼和米杜士堡，你冇睇錯，係逼和。好在有捷西斯做救世主，唔係領隊哥迪奧拿搲爛頭都唔得掂！
【22:56】 愛華頓 0:3 車路士 全場完
車仔換邊後多得柏度射個世界波，幫球隊打開缺口，最後以3球大大啖食糖！佢哋依家領先陣間開波嘅2哥熱刺7分，相信都畀2哥唔少壓力。
【22:49】 愛華頓 0:3 車路士
車仔食硬糖！法比加斯落底出個地波畀韋利安入多球，3球領先愛華頓，呢3分穩陣啦。
【22:46】 米杜士堡 2:2 曼城
一係唔入，一入就15分鐘整3球！曼城射手阿古路今次做助攻手，傳中畀加比爾捷西斯一頂破網！唔通捷西斯又做「耶穌」！？
【22:41】 愛華頓 0:2 車路士
車仔悶？佢哋喺近80分鐘左路罰球，由夏薩特傳中，史基倫堡畀自己Fake咗，拍唔走個波，畀加利卡希爾整多球。悶咩呀咩！？
【22:38】 米杜士堡 2:1 曼城
唔知係咪曼城怕大家睇車仔場波有啲悶，畀米堡整多粒！尼格度78分鐘門前混戰交波畀哥林張伯斯，呢位三獅小將喺門前一篤，搞掂！
【22:31】 米杜士堡 1:1 曼城
曼城喺69分鐘憑12碼追和，入波功臣就係「阿古獸」阿古路！
【22:28】 愛華頓 0:1 車路士
柏度洛迪古斯為車仔先開紀錄！呢位狂牛中前場喺對手禁區頂推咗兩步，起左棍狂抽，就算史基倫堡撲到都入！
【22:22】
安拿華倫西亞喺車仔禁區內，通渠壓過對方守將，可惜唔知佢想傳定想畀，最後高圖爾斯截住個波。1分鐘盧卡古右路推入大位抽射，可惜食死咗，冇乜威脅。
【22:18】
迪哥趁住菲爾積基卡回傳唔夠力，想喺史基倫堡到之前截住個波，不過唔夠快之餘，仲鏟到拖肥門神攤攤腰，食張黃牌冷靜下先啦！
【21:52】 愛華頓 0:0 車路士 半場完
雙方半場快打快，娛樂性十足，但係埋門就一般啲，所以未開紀錄，希望下半場可以會更精彩。另外，曼城作客米杜士堡，半場落後緊1球，入波個位正正就係只係效力過1季嘅棄將尼格度！雖然佢左腳射右腳入波呢下「神技」極負碌，但係a goal is a goal，最緊要領先！
【21:26】
車仔防中尼曼查馬迪殺得性起，中場推進連過幾件，禁區頂起腳可惜太正。轉個頭盧卡古喺藍戰士守將力壓之下，冷不防射個地波，可惜攞得太盡唔中龍。
【21:16】
車路士喺11分鐘打個反擊，迪哥畀個直線拍檔夏薩特，不過就大力咗啲。呢位比利時國腳禁區內避開出迎嘅拖肥門將，窄位一射未能命中目標。
【21:07】 愛華頓 0:0 車路士
拖肥球員一開波就嚟料，話咁快就有一次中灶柱，盧卡古門前未能補射，開唔到紀錄
【20:57】 曼聯 1:1 史雲斯 全場完
曼聯半場雖然多得12碼，取得領先，但係天鵝換邊後有施古臣入靚爆罰球追和，最後雙方以1:1打和。紅魔話就話連續25場不敗，但係都唔見咗好多2分。
【20:49】
下半場補時6分鐘，唔通要補到分勝負方休！
【20:39】曼聯 1:1 史雲斯
下半場34分鐘，史雲斯喺曼聯禁區頂博到罰球，基菲爾施古臣一射破網追成1比1平手。曼聯中場安達靴里拉原本企喺柱邊想幫手，諗諗下決定走番去人牆，避免對手前鋒冇越位，點知嗰波就喺佢原本企嗰位入咗。
【20:31】
史雲斯用晒3個換入名額，利萊費亞、謝法臣蒙迪路及馬田奧臣先後入替，希望可以搶番1分。
【20:21】
下半場16分鐘，安東尼馬迪爾禁區邊起左腳射波，省中敵方守衞改變方向，史雲斯門將法比安斯基僅僅用腳救出。
【20:08】
下半場開波，曼聯立即有個黃金機會，朗尼禁區內接應安達靴里拉橫傳撞射，點知省中自己友安東尼馬迪爾。
【19:48】 曼聯 1:0 史雲斯 半場完
魔鵝戰半場完，史雲斯半場踢得有板有眼，而且不乏有威脅嘅埋門。曼聯唔係冇攻勢，不過表現比較被動，好在完半場前有拉舒福特博到12碼，朗尼一射破網先開紀錄。法比安斯基出迎個時縮晒手，但係球證認為佢同拉仔有接觸，天鵝咁輸個12碼，半場落後真係有啲唔抵。
【19:31】
個頭話紅魔上力壓前進攻，天鵝差啲就反擊搞掂，阿休右路窄位狂抽，畀迪基亞擋出
【19:29】
馬迪爾右路突然洛賓上身，拐入中路推過兩個史軍守將起腳，不過就冇洛賓咁準，考唔起天鵝門將法比安斯基
【19:26】
基菲爾施古臣有個表演罰球機會，雖然射得都算唔錯，可惜今次畀紅魔門神迪基亞接到實一實。
【19:22】
客隊雖然係護級份子，但係踢落完全唔怕曼聯，開賽20分鐘攻勢唔少，而且仲有啲威脅添。相反紅魔唔夠積極，畀天鵝控制比賽，只得連格、朗尼埋過門。
【19:14】
奇誠庸12分鐘一個靚斬中，佐敦阿休射門被擋出，之後天鵝球員阻止紅魔守將解圍，差啲就靠運得手。好在唔中龍，唔係就大鑊，因為個時迪基亞就反應都冇，只係企喺度。天鵝猛攻不止，紅魔一度受到好大威脅，好彩冇事。
【19:08】
勞基梳爾只係打咗8分鐘，就因為腿傷要退下火線，由路爾斯華倫西亞入替
【19:02】
波已開，史雲斯開局有板有眼，搓波都幾流暢，呢隻鵝真係護緊級！？紅魔對住聯賽榜下半版球隊不時都和波，佢哋仲要爭前4，天鵝咁OK，小心啲好喎。
18:30 曼聯 對 史雲斯
今晚英超頭場紅魔鬼曼聯主場鬥天鵝史雲斯，紅魔鬼今場有朗尼打正選中場，米希達利恩、路爾斯華倫西亞及達美安退居後備，改用連格、艾舒利楊格及勞基梳爾打側擊，另一好消息係西班牙中場桑馬達有份喺後備名單。史雲斯方面變動不大，南韓中場奇誠庸改替利萊費亞打正選，前線則由佐敦阿休、洛蘭迪及基菲爾施古臣攻堅。
曼聯正選陣容：
門將：1迪基亞
後衞：18艾舒利楊格、3艾歷拜利、17戴利白蘭特、23勞基梳爾
防中：16 卡域克、21安達靴里拉
中場：11安東尼馬迪爾、10朗尼、14連格
前鋒：19拉舒福特
門將：1法比安斯基
後衞：26 基爾洛頓、6艾菲莫臣、33費達歷高費南迪斯、35史提芬京士利
中場：4奇誠庸、7里安比頓、42湯卡路爾
前鋒：3佐敦阿休、9洛蘭迪、23基菲爾施古臣