香港人生活壓力大，尤其係宜家非常時期嘅香港，好多人都好易頭暈，作嘔作悶，影響工作，有咩病因，可以點舒緩？

註冊中醫師指出，眩暈係指眼花或眼前發黑又頭暈，感覺自身或外界景物旋轉，病症輕微嘅話合埋眼休息一陣就得，但如果嚴重，就會連企定都有困難、出汗作嘔、臉色蒼白甚至暈低。而病位喺頭竅，病因非常複雜，同心、肝、脾、腎、陰陽盛衰有關:

1.風火上擾

唔少高血壓患者都係此類型，平時陽盛火旺，肝陽上亢，風火上擾。

2.痰濁中阻

頭暈可能係因為平時飲食有問題，損脾胃，濕聚成痰濕。而痰濕令清陽不升，濁陰不降，所以會易頭暈同攰，覺得身體沉重。

3.心脾兩虛

經常思考過度，太勞心，傷心脾而耗損氣血; 或者大病之後令氣血不足，引致血虛同頭暈。

4.腎精不足

經常捱夜或年老，腎氣衰弱、腎精虧耗，就會易暈。

5.瘀血阻絡

如果頸、頭曾經受過傷，會導致腦部血液循環唔好，除咗易有頭暈，亦可能會出現頭痛、冇記性、手腳麻痺嘅情況。

註冊中醫師推介以下止暈湯水:

山藥蓮子湯（1人份量）

材料： 山藥1兩、蓮子1兩、白扁豆5錢、生熟薏仁各2錢、白術4錢、瘦肉4兩、海鹽適量。

方法：

瘦肉汆水; 放入所有材料，加適量清水，大火煮滾後轉慢火煲2小時，最後加海鹽調味即成。

功效： 溫燥化痰、健脾利濕。

服法： 可以連續飲3日。

禁忌：大便乾結、陰虛、氣滯脹悶者忌服。小兒、孕婦同長期病患者服用前請先咨詢註冊中醫師。

#湯水食療星期四 #止頭暈湯水 #眼花 #痰濕 #血虛 #頭暈成因複雜 #頭暈同腎精不足有關 #中醫治頭暈 #中醫保健 #中醫養生 #疾病預防 #健康資訊 #dreason #dreasonbb #health