《星夢傳奇》前晚第一集出街，對於被指內定三甲為人選嘅梁烈唯，最後只係僅僅熟，黃智雯更包尾即晚被out…

不過又有另一個驚喜，現年29歲、曾演出無綫劇《法證先鋒II》、《大太監》嘅四線藝員鄭俊弘得分最高，佢選唱陳奕迅嘅《時代曲》，評審讚之餘，觀眾都好buy。網民直頭Like爆，大讚鄭俊弘比唔少歌星仲要唱得好，又話佢有永不放棄精神添！

加入無綫十年嘅鄭俊弘接受本報專訪時坦言：「喺無綫拍咗約四十幾部劇，大多數都係配角、客串，我鍾意藝術，一定唔會放棄，總有出頭天，只要堅持一定會等到，最少得着係行到出街，人哋見到我講得出我個名。」

鄭俊弘其實唔係有好大野心，於01年參加《全球華人新秀歌唱大賽》，獲現場最具風采獎、突破新秀巨星演繹獎和網上完美之聲大獎，但遇上唱片公司大地震，無奈轉做演員。

鄭俊弘話，今次參加《星夢》，都係經理人支持下，佢話：「十年窗下無人問，一舉成名天下知。我想我另一面俾人睇到，唔係只係做人哋細佬角色，苦等十年，只求觀眾講得出我個名。」鄭俊弘亦一直有夾band玩音樂，甚至有自己創作嘅歌，多年嚟從未放棄過音樂。

《星夢傳奇》令鄭俊弘一唱成名。

鄭俊弘真係好鍾意唱歌喎！

唔講，真係唔知，鄭俊弘十幾年前參加新秀出道。

演劇多年，台風？難唔到佢嘅。

鄭俊弘一直有夾band玩音樂。

「只要堅持一定會等到」，就係呢份堅持，鄭俊弘終有出頭天。