郭富城愛駒「舞林密碼」大熱勝出　袋百萬獎金

天王郭富城今晚帶住太太方媛入場為愛駒「舞林密碼」打氣，結果不負眾望，喺何澤堯胯下以大熱門身份贏馬，贏得$1,041,600獎金，而今場亦係騎者傷愈復出後首捷。郭富城仲有新愛駒「著迷」放喺方嘉柏馬房，希望之後都繼續有頭馬拉呀！

賽後，郭富城話今場贏得驚險，而佢抱平常心面對，同時知道好多馬迷捧場，好開心冇令大家失望。城城仲話今場最大擔憂係「舞林密碼」需負重磅，但何澤堯發揮出色，克服135磅頂磅交出佳績，而方嘉柏一直都照顧得「舞林密碼」好好。今場贏完會升上二班，希望繼續交出好表現。

今場跑第2名為艾道拿「美麗邂逅」，霍宏聲「雅典武士」跑第3，第4名為巫顯東「高明駿將」。