〔通勝〕又叫做〔通書〕或者〔黃曆〕，係本年年出嘅曆書，多數係用要來睇時間表。通勝通常係為咗方便生活而做書，可以查有嗰年啲日子，有乜要做，有乜唔可以做等。內容包羅萬有，入面有好多天文數字，例如日出日落、月出月落嘅時辰、日食、月食、大潮小潮等。

西人通勝有敎會節期，時間表等等。唐人通勝有占卦、星相等資料，重有唔少都同農耕時令有關。西洋有啲係專畀某啲行業睇嘅。

廣東話〔通書〕同〔通輸〕係同音，輸輸聲唔好聽，所以就將〔輸〕嘅相反，叫〔勝〕，所以叫通勝。廣東話有話〔唔可以一本通書睇到老〕，通書年年唔同，當然唔可以年年睇住一本通書，唔係就食古不化，唔識變通嘞。

喺《通勝》入面，有一個文字最多嘅欄目，係寫住每日要做啲嘢嘅宜忌事項。下面就有一啲有關事項嘅術語。

擇日宜忌術語

〔婚姻方面〕

．納采　　〔提親，說親〕傳統婚禮嘅六禮之一，婚嫁第一步驟，

　　　　　　　即係男家準備禮物到女家屋企求婚。

．問名　　〔〕傳統婚禮嘅六禮之一，婚嫁第二步驟，

　　　　　　　男家將問女家姓名書信交畀媒人帶到女家屋企，

　　　　　　　女家回書，裡面有女家姓名、生辰八字同佢生母姓名。

　　　　　　　納采同問名通常係連住做，

　　　　　　　又叫納采問名或者乾脆只叫納采。

．納吉　　〔〕傳統婚禮嘅六禮之一，婚嫁第三步驟，問名之後，

　　　　　　　男家將男女兩人生辰八字交畀算命師傅，

　　　　　　　師傅算出兩人合適之後，男家又去占卜，

　　　　　　　必須卜到吉兆，然後通知女家，婚姻已定。

．納徵　　〔納幣、行聘、訂盟、過定、文定、完聘、訂婚，俗稱小聘〕

　　　　　　　傳統婚禮中嘅六禮之一，婚嫁第四步驟，納吉之後，

　　　　　　　男家備妥聘金同埋各種禮物送去女家。

．請期　　〔〕傳統婚禮嘅六禮之一，婚嫁第五步驟，

　　　　　　　納徵之後，男家選擇結婚日，告之女家，徵求女家同意。

．親迎　　〔迎親、嫁娶〕傳統婚禮嘅六禮之一，

　　　　　　　婚嫁第六亦係最後一個步驟。

　　　　　　　請期之後，新郎喺已經定好嘅日子，

　　　　　　　著禮服到女家屋企接新娘返新郎屋企拜堂。

．裁衣　　〔〕主要係指剪裁新娘嘅禮服，另外仲指剪裁喪事嘅壽衣。

．安床　　〔〕係指安置床鋪。又分安置新床同舊床重新安置。

　　　　　　　安置新床係指嫁娶前男家安置新人房嘅床。

　　　　　　　舊床重新安置係因為運勢唔好或者女人好耐都仲未有喜，

　　　　　　　重新安排過床嘅位置同方向，以求改運或者女人懷孕。

．合帳　　〔設帳〕縫製新郎同新娘要用嘅蚊帳，

　　　　　　　安床同設帳通常合而為一，有時亦會合叫安床設帳。

．開容　　〔整容、挽面〕古代指新娘出嫁前，會請人用線鎅走面毛。

　　　　　　　喺現代就可以指新娘美容或者化妝。

．納婿　　〔招婿〕同女家嫁到男家為媳相反，

　　　　　　　納婿係指男家入贅女家為婿。

　　　　　　　男家而言係入贅，女方而言係招贅。

建築搬遷

〔搬遷方面〕

．移徙　　〔〕搬屋，搬廠，搬寫字樓。搵……

．入宅　　〔〕搬入新屋。

〔拆卸建築方面〕

．破屋壞垣〔〕拆屋同拆圍牆，垣嘅意思係牆。

．拆卸　　〔〕拆樓。

〔建造方面〕

．修造　　〔豎造〕修理建造各種建築物。

．動土　　〔〕建築房屋時、第一次動起鋤頭挖土。

　　　　　　　填平窪地或剷平凸地時亦在此列。

．起基　　〔起基定磉〕磉係柱下面嘅石頭，即係起屋時嘅打地基工程，

　　　　　　　起陽宅時，重要嘅係位置同方向，

　　　　　　　「定磉」指嘅定係定方向。

．架馬　　〔起工架馬〕舊時指起屋時搭嘅木架，方便工程施工，

　　　　　　　現代就係指鷹架。

．蓋屋　　〔蓋屋合脊、蓋屋泥壁、蓋屋泥飾〕蓋屋頂同粉刷泥壁。

．安門　　〔造門〕裝門，主要係是指大門、正門。

．垣牆　　〔〕起屋同四周嘅圍牆。

．平治道塗〔〕將間屋四周圍嘅路鋪平。

〔粱柱方面〕

．伐木　　〔伐木作粱、入山伐木〕斬樹，用來做起屋嘅粱。

．開柱　　〔〕開柱眼，喺粱柱上面開洞。

．定粱　　〔〕固定粱木。

．豎柱上粱〔〕立柱，上置橫樑。

〔安裝設備方面〕

．作灶　　〔安修廚灶〕舊時係製作或修補爐灶；

　　　　　　　現代係安裝或修理爐俱。

．安磨　　〔〕安裝石磨等用具。

．作廁　　〔開廁〕起或修改廁所，古代包括廁坑，

　　　　　　　現代就包括排污管。

〔特殊建築方面〕

．造倉　　〔造倉庫〕起倉庫。

．齋醮　　〔〕大廟做建醮之前，需要舉行嘅齋戒儀式。

．造廟　　〔〕起宗祠，寺廟等。

〔修補方面〕

．修倉　　〔修倉庫〕修理倉庫。

．補垣塞穴〔〕修補牆身嘅窿。

．補垣牆　〔修飾垣牆〕修補粉刷間屋四周嘅圍牆。

〔買賣產業方面〕

．置產　　〔修置產室〕收買起好咗嘅屋。

．買宅受田〔〕收買住宅同田地，或者接收贈送嘅住宅同田地。

〔同水有關建設方面〕

．造橋　　〔〕起橋樑。

．開渠　　〔〕做室內或者附近嘅水溝，現代包括下水道。

．穿井　　〔開井〕開水井。

．開池　　〔〕挖池塘。

．作陂　　〔〕陂池即係蓄水池，起蓄水池。

．放水　　〔開渠放水〕主要指將啲水注入新嘅蓄水池。

．築堤　　〔〕修築堤防，即係起堤壩。

生活起居同儀式慶典

〔家庭成員方面〕

．分居　　〔〕係指大家族分家，成員搬去其他地方住。

．進人口　〔〕認養義子，養子；增添家丁長工。

〔衛生方面〕

．剃頭　　〔理髮〕主要係指蘇蝦仔第一次剃去胎毛。

．整手足甲〔〕剪指甲同腳甲，主要係指蘇蝦仔第一次做嘅。

．沐浴　　〔〕即係沖涼，主要係指齋戒沐浴淨身，

　　　　　　亦指蘇蝦仔第一次洗身。

．掃舍宇　〔解除〕打掃屋內外。

．求醫療病〔〕求醫治療或者做手術。

．療目　　〔〕治療眼睛。

．針刺　　〔〕古代指針灸，或者畀啲奴隸紋身，現代包括打針。

〔教育方面〕

．入學　　〔〕入學校，去學堂接受教育或者拜師學藝。

〔儀式慶典方面〕

．冠笄　　〔冠帶〕指男女嘅成年儀式。冠你帽嘅古稱，笄即係簪。

　　　　　　　古代成年禮嘅儀式；

　　　　　　　男仔20歲成年時行嘅成年禮時要帶冠，

　　　　　　　女仔15歲行成年禮時要插簪。

．會親友　〔〕拜訪親友，或者設宴款待親友。

．進壽　　〔做生日〕同長輩做生日。

．上官赴任〔赴任〕新官上任嘅就職典禮。

〔旅行方面〕

．出行　　〔出外〕遠行，旅行。

〔打官司方面〕

．訴訟　　〔〕打官司，起訴狀。

〔喪葬方面〕

．入殮　　〔〕將屍體放入棺材。

．移柩　　〔〕移動棺材。

．破土　　〔〕指埋葬死人

　　　　　　　同起樓嘅「動土」唔同，但有啲人有時都會誤用。

　　　　　　　英語groundbreaking，唔係中文傳統嘅破土，

　　　　　　　而係指a sod-turning ceremony動工儀式。

．安葬　　〔〕舉行埋葬儀式。

．修墳　　〔〕修理墳墓。

．啟攢　　〔〕係指執骨洗骨。

〔其他方面〕

．祭祀　　〔〕指廟宇舉行祭天；或者宗祠舉行祭祖大典，

　　　　　　　唔係一般燒香拜神。

．祈福　　〔〕祈求神明降福或者設醮還願嘅事。

．開光　　〔〕佛像做好之後、供奉上位嘅事。

．栽種　　〔〕種田。

．開市　　〔〕舖豏開張。

．立券　　〔〕訂立契約互相買賣嘅事。

．交易　　〔〕訂立契約互相買賣嘅事。

．求嗣　　〔〕向神明祈求後代。

．納財　　〔〕買屋買地、入貨、收帳、收租、追債、貸款、

　　　　　　　五穀入倉等。

．掛匾　　〔〕係指掛招牌或者牌匾。

譯：舊南仁．2016年3月3日

術語連篇。廣東話資料館