眾所周知，退休人士為咗解決退休後生活嘅使費，單靠強積金(MPF)係唔夠㗎，所以按揭證券公司就喺2012年推出「安老按揭計劃」，即係坊間所講嘅「逆按揭」，專俾55歲或以上有樓揸手嘅長者，將佢哋自住嘅物業按俾銀行，然後每個月攞一筆錢作為生活費；所以，呢個計劃其實係適合有樓但手頭上cash唔夠嘅「老友記」。
一般嚟講，我哋買樓就同銀行借錢，跟手每個月供樓，呢啲就係「樓按」；而「逆按揭」就即係成件事反轉嚟玩，即係將手頭上已經供滿按揭嘅樓，反向按俾銀行，而銀行就會每個月向長者業主俾番一定數量嘅金額，所以就有「逆按揭」呢個名啦。
暫時嚟講，私樓、未補地價嘅居屋(即係綠表居屋)、夾屋及公屋都可以向銀行申請「逆按揭」。
另外，根據按揭證券公司要求，申請人必須持有香港身份證，而按俾銀行層樓嘅樓齡須為50年以下，申請人亦都可以揀10年／15年／20年嘅固定年期，又或者係終身每月收取年金，直到「逆按揭」到期為止，到時銀行就會收番層樓進行拍賣；而按比銀行層樓嘅估值就用市值再減地價之後計算。
以一個60歲單身退休人士為例，層樓每值100萬，呢位「老友記」每個月就可以攞到$2,000至3,700。
再舉多一個例子，同樣都係60歲單身退休人士，不過今次選擇10年年金年期，而佢層樓嘅估值係600萬，咁每月可以得到嘅年金就係$22,200元($3,700x6=$22,200)。(見下表一)
表一：
每月年金金額 | |||||||||
| 參加年歲 | 55歲 | 60歲 | 70歲 | ||||||
| 年金年期 | 單人借款 | 二人借款 | 三人借款 | 單人借款 | 二人借款 | 三人借款 | 單人借款 | 二人借款 | 三人借款 |
| 10年 | $3,200 | $2,800 | $2,500 | $3,700 | $3,300 | $3,000 | $5,100 | $4,600 | $4,200 |
| 15年 | $2,400 | $2,150 | $1,900 | $2,800 | $2,500 | $2,250 | $3,800 | $3,500 | $3,200 |
| 20年 | $2,050 | $1,800 | $1,600 | $2,400 | $2,100 | $2,100 | $3,300 | $3,000 | $2,700 |
| 終身 | $1,650 | $1,450 | $1,250 | $2,000 | $1,800 | $1,800 | $3,100 | $2,800 | $2,400 |
| *註：單位：港元；以樓價每100萬元及單人借款計算；資料來源：香港按揭證券有限公司 | |||||||||
當然唔係個個退休人士都係單身貴族啦，如果層樓係以聯名方式(可能係兩公婆當初聯名買入)而拎去做「逆按揭」嘅話，咁每個月嘅年金計算方法就會用後生啲個位退休人士為準。
另一個遊戲規則最重要嘅部份就當然係層樓嘅估值啦， 係咪即刻諗到：如果趁樓價高嘅時候同銀行申請「逆按揭」，咁個估價高啲，每個月拎嘅錢又會多啲囉？有邊間公司真係會做「蝕本生意」先得架；根據按揭證券公司嘅資料，如果層樓嘅估值係超過800萬，又或者屬於轉按現時安老按揭貸款物業嘅話，其實按揭證券公司係可以全權酌情決定去點做嘅。有關物業估值嘅玩法，又可以睇睇下面：
表二：
如物業估值超過$800萬元 | |
| 物業估值 | 指定物業價值的最高金額 |
| 800萬元或以下 | 物業估值的100% |
| 800萬元以上至1,200萬元 | 物業估值的80%或$800萬元(以較高者計) |
| 1,200萬元以上至1,600萬元 | 物業估值的70%或%960萬元(以較高者計) |
| 1,600萬元以上 | 物業估值的60%或$1,120萬元(以較高者計，上限為$1,500萬元) |
| *註：單位：港元；資料來源：香港按揭證券有限公司 | |
表三：
如屬轉按現有安老按揭貸款 | |
| 物業估值 | 指定物業價值的最高金額 |
| 1,200萬元或以下 | 物業估值的80% |
| 1,200萬元以上至1,600萬元 | 物業估值的70%或960萬元(以較高者計) |
| 1,600萬元以上 | 物業估值的60%或1,120萬元(以較高者計，上限為1,500萬元) |
| *註：單位：港元；資料來源：香港按揭證券有限公司 | |
仲有，唔好以為將層樓按比銀行就大晒，唔駛畀息，其實唔係，係需要畀息，仲唔平添；由於「逆按揭」貸款利息係用總結欠嘅年利率P-2.5厘，同埋按月用複息計算，不過，因為借款人，即係長者在生時係唔駛還錢，所以利息計算就會變成「利疊利」咁加上去，咁就即係增加咗你嘅債務，又暗示長者可以留比下一代嘅資產變少咗，甚至當層樓不足以抵銷債務嘅時候，到時可能需要由子女承擔。
當然，如果「老友記」膝下無子嘅話，咁呢個問題就變咗唔係問題啦。
仲有最後一樣嘢就係，其實借錢都要俾「成本」，有無聽過人哋話借10萬，但到手時可能只得8萬？呢啲所謂嘅「成本」，包括評估費、顧問費、律師費同其他雜費等；若然借款少但年期長，咁呢啲「成本」就可以攤分嚟俾，變相減低「成本」開支；但如果借款多但年期短嘅話，分分鐘「借10萬，實收5萬」，被人cut 咁一半添。
所以各位「老友記」如果想申請「逆按揭」嘅話，其實事前應該計計數；再諗深一層嘅係：你到底係咪想用「逆按揭」嚟換Cash先？
延伸閱讀：【 綠表 買居屋】置業不是夢 綠表人士購買居屋需知
延伸閱讀：【按揭知多啲】點解要「 轉按 」？
經本網比較及轉介按揭，成功申請按揭額每HK$100萬送HK$500現金券，最高可享HK$6,000現金券。
【推薦再賞】另外，成功推薦親友經本網申請按揭，每HK$100萬按揭貸款額可獲HK$100超市現金券！ 詳情
想揾全港最抵的按揭產品？立即上MoneyHero.com.hk嘅按揭比較平台，比較不同銀行按揭產品嘅年利率、每月還款額同總按揭支出啦！
如果想退休多些保障，亦有人會選擇買延期年金，而且善用年金扣稅，更可以慳不少稅。
想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！
回到文章
