所謂一雞死一雞鳴，見有人食飽人血饅頭後走佬風流快活，有人即刻「急起直追」，想標返個尾會，但如果太貪心而唔記得晒啲「人情世故」，就隨時俾「同路人」篤到以後冇飯開。《蘋果日報》停刊後，網上就出現咗多張所謂「值得支持」嘅黃媒名單，自稱網媒「高登討論區」記者嘅「軍火佬」近日就開live大鬧「賢學思政」召集人王逸戰，話「賢學」早前都有列出「值得支持媒體」，但名單中竟然冇經常採訪佢哋嘅「高登」。身為「記者」嘅「軍火佬」當然好唔忿氣，大爆「賢學」背後經常借光環呃錢，然後兩邊隔空駁火，睇到啲網民都唔知信邊個好嘞。

埋怨採訪又送支票冇回報

「軍火佬」日前喺fb開live，大呻「賢學」初初蒲頭嗰陣，「高登」一直有「採訪」佢哋，「軍火佬」仲話自己試過出錢call車幫擺完街站嘅「賢學」運送物資，甚至幫埋「賢學思政」成員支付違反「限聚令」嘅罰款，冇諗過「高登」喺「賢學」嘅「值得支持媒體」名單上竟然榜上無名。

粗略估計，「軍火佬」起碼喺條片中講咗過百次粗口，仲直認自己「搞分化」，又拍晒心口咁話「高登」有晒記錄，質問王逸戰到底點解唔支持「高登」，「你做審查員？差佬（警察）玩認證，你哋又做認證，抵你死×街！」

其實又好難怪「軍火佬」咁火滾，事關原來「軍火佬」為咗幫「賢學」支付「限聚令」告票罰款，籌晒錢仲寫埋多張抬頭為香港特區政府嘅支票畀佢哋，冇諗過對方竟然問：「係咪畀現金？」攞咗支票後，佢哋竟然兩個月都冇兌數，影響埋其他等錢交「限聚令」罰款嘅「手足」，搞到「軍火佬」忍唔住質問「賢學」：「當我哋慈善家？你光環大得過黃之鋒？我唔知你問過幾多個人攞錢𠻹呀！」

「賢學」話燒錢打官司 暫不兌數

唔知係咪因為俾網民狂鬧「陋惡盡露」，「賢學」似乎被嚇到隔咗幾日先諗掂點樣寫篇「澄清聲明」，內文就話佢哋唔兌現「軍火佬」嘅支票，係因為覺得喺同律師商量後覺得案件「有抗辯空間」，唔想白白送錢畀政府，更聲稱佢哋從來冇要求過只收現金，聲明最後仲好寸咁話：「希望指控我們的人能拿出證據並當面對質。」

至於「值得支持媒體」嘅爭議，香港文匯報記者噚日睇過王逸戰同「賢學」嘅社交平台，但就未搵到「軍火佬」講嗰張名單，只見到王逸戰喺instagram個動態度話「清者自清」。

網民「渡邊麻復生2」就好理解「軍火佬」嘅感受：「幫人抬晒轎得個吉（桔）。其實個班細蚊仔咩人黎（嚟）？2020之後先彈起，唯一功能係擺街站同收課金。」「Sunning Hui」就覺得「賢學」好奇怪：「冇錢交罰款，但有錢請律師，呃多的錢准（準）備走佬？」

不過，「Joanne Lee」就對「賢學」表示「百分百信任」：「信您哋呀，唔好咁介意，呢啲冇證據想搞事嘅人好多。」「Lam Yi Ching」更揶揄「軍火佬」：「班細路冒住咁大風險呃果（嗰）少少錢，搞分化都麻煩智商高啲啦。」 ●香港文匯報記者 雨航