台慶劇開播日期爆光 《跳躍生命線》10月有得睇啦！

今年嘅台慶劇包括有《跳躍生命線》、《是咁的，法官閣下》及《兄弟》。最近有傳媒爆《是咁的，法官閣下》已經確定首播日期，將會接住《再創世紀》於10月29日九點半首播，《跳躍生命線》就傳10月8日八點半緊接內地大熱劇《延禧攻略》播出。另外，《兄弟》就將會喺台慶月壓軸推出。

其實今年幾套重頭劇搵嚟一班重量級演員助陣，但外間嘅反應暫時好似未有預期咁好，就好似《宮心計2》。相反親情小品劇集近年成功發圍，例如《BB來了》就因為內容貼地又寫實，引起唔少觀眾共鳴，收視及口碑都唔錯。

《跳躍生命線》同《是咁的，法官閣下》都搵咗班好戲之人坐陣，《跳躍生命線》就搵嚟回巢嘅馬神馬德鐘帶領何廣沛、劉佩玥、張曦雯及羅天宇等等主演，主要圍繞救護員嘅生涯，每日爭分奪秒救援嘅情況。以律政為題材嘅《是咁的，法官閣下》就由黃智賢、關禮傑及王君馨主演，劇集仲搵咗香港近年發生過嘅社會議題為藍本，相信會更容易引起觀眾共鳴。至於《兄弟》就由上年「視帝」王浩信、「飛躍進步男藝員」楊明、伍允龍及江嘉敏擔正，劇情主要圍繞兄弟情。

《跳躍生命線》及《是咁的，法官閣下》都採用有收視保證嘅嘅題材，雖然女主角劉佩玥同王君馨都係第一次擔正，不過相信都會吸引唔少人睇。至於《兄弟》方面，劇集以電影級制作，遠赴外國取景，更有觀眾喜歡睇嘅動作場面。無綫將佢放喺台慶月播出，唔知係對劇集好有信心定係為王浩信再拎視帝鋪路呢？