【超時空男臣】三妹陳偉琪終於唔駛性感 從良好感動：差啲喊出嚟
《超時空男臣》平均收視25.8，媽咪級電視精當然看田蕊妮和三位「男臣」，但對後生仔來說，劇中飾演三妹的陳偉琪Vicky才是重點，雖然她在劇中集集冷帽又衞衣、長褲，但眾所週知她是水著女神，每天追看她的ig是宅男指定動作，水著、性感運動裝束，是她的標記，但除了吸引的外表，２６歲的她其實是University of British Columbia（UBC）政治及哲學系畢業。
水著女神是哲學系畢業生，已經想不到，更離奇的是平時每張ig相都性感的她，今次不用性感，開心到眼濕濕，她說：「我好多謝監製羅永賢俾呢個機會，佢見到我拍啲劇全部角色都係性感呀、要姣呀，佢話俾個機會我做返自己，佢揾我做嗰陣，我係感動到差啲喊出嚟，自己竟然有個發揮嘅角色，但唔駛我低胸，真係估唔到，好開心呀，監製見我想喊咁，都叫我唔駛太激動。其實我唔介意健康性感，但有時係over咗，上兩年不停有人叫我著泳衣，我覺得冇所謂，但而家都3年啦，我都想少啲。」
除了今次《超時空男臣》演三妹外，陳偉琪多演性感兼貪錢的女人，但現實中，其實不太追求物質，她說：「我都唔買名牌，我著嗰啲波鞋大部份係sponsor，其實未做呢行前，我喺一間律師行做，初時見工想做見習律師，但之後就做client relationship manager，我用錢唔多，或者呢個唔駛錢嘅性格先可以喺無綫捱，做藝員嗰種滿足感係其他工俾唔到我，行出街有人叫自己做三妹，好開心㗎，而家收入當然冇得比啦，以前差唔多３至４萬一個月，我可以俾一半以上屋企，自己駛一萬蚊都好夠，而家喺無綫真係好少，我冇底薪㗎，６千蚊都冇，（三千？）三千都講多咗少少，嗰個月爆騷就有萬零二萬蚊，如果嗰個月得一兩個騷，可能得兩三千蚊。」
陳偉琪父母已經退休，她亦是家中獨女，對於收入不穩定，她亦非常擔心，她說：「我好彩間唔中有啲司儀騷接下，而家簽咗另一間經理人公司，可以拍下電影，我又考咗健身教練牌，咁睇下可唔可以多幾樣揾食，其實都好掙扎，我都想家人安心，不過真係要自己慳囉，我由大學嗰陣已經係咁做part-time，原本讀4年縮到3年完成，餐廳侍應、球証、幫人補習，好多我都做過，希望呢次三妹嗰角色入屋，自己有多啲角色演啦。」