政Whats噏：遭警方國安處拘捕　朱慧盈退出本土青年意志

成立僅4個多月嘅學生論政組織「本土青年意志」，日前透過社交平台發表聲明，指朱慧盈決定辭去發言人職務以及退出該組織，並已得到其他成員嘅接納。

本身係浸大文學院學生嘅朱慧盈，除「本土青年意志」外，亦係另一個上月宣布解散嘅組織「賢學思政」嘅骨幹成員。舊年12月尾，朱慧盈聯同王逸戰、黃沅琳等「賢學思政」嘅戰友召開記者會，交代舊年11月被警方國安處人員嚴重警告違反國安法一事，當時曾揚言決不輕言退縮或放棄。

而喺今年中秋節前夕，警方國安處拘捕包括朱慧盈在內嘅3位「賢學思政」成員，並控以「串謀煽動他人實施顛覆國家政權」罪，且須被還押至下個月初再訊。