石棉 asbestos 大家都知道英國買樓好伏,其中一樣有可能會遇到嘅係石棉嘅問題,只要間屋係在2000年前建成都有機會在驗樓測量報告內指出有石棉存在嘅風險。 相信大家唔多唔少都知道吸入石棉會致癌及對肺部造成致命嘅永久傷害,但由於石棉係一種堅固耐熱防火及高度保溫嘅天然物料,除咗會死人之外其實有不少好處,因此在建築工程嘅應用已經有悠久歷史。英國在二次大戰後要應付大量房屋需求,雖然當時已有初步報告顯示石棉對人體有害,但石棉嘅使用依然不斷增長,到六、七十年代到達高峰。石棉又可以歸為兩類:serpentine (白石棉) 及 amphiboles (青石棉),當中以 serpentine 較為常用,但 amphiboles 就有害得多,因此早於1985年已經被禁,而相對冇咁嚴重嘅 serpentine 就要到1999年先全面禁用。只要石棉冇被干擾係冇危險嘅,但如果被破壞而飛散在空中就有吸入體內嘅風險。 如果上手業主冇石棉檢驗報告証明,最理想當然係搵有專業認證資格嘅石棉測量人員去進行實地考察抽樣測試,尤其係進行裝修或加建前,一來可以買個安心,二來賣樓時亦有個記錄。一旦發現屋內有石棉的話,可以視乎專家風險評估去作出相應措施,石棉情況良好及在唔容易受干擾嘅位置未必一定要清除,但如果已受破壞就別無選擇一定要移除。 不過驗樓測量師好多時為穩陣起見,即使未必親眼見到,只要係2000年前落成嘅建築物多數都會提及要注意石棉。但如果間屋在2000年以後曾經過大型翻新加建等工程嘅話,石棉好大機會已經被清除,風險會較低,但當然如果冇一紙證明都唔能夠完全抹殺可能性,做唔做 asbestos survey 始終都要自己衡量風險。 由於石棉並唔容易用肉眼分辨,所以唔喺到擺相喇,廢事誤導大家。 以下HSE嘅網頁有部分例子。 https://www.hse.gov.uk/asbestos/gallery.htm 圖中係住宅單位中最經常發現石棉嘅位置。 Photo credit: HSE #石棉 #Asbestos #UKHongKongArchitect