《財神駕到》係香港無綫電視古裝電視劇，由黎耀祥、單立文、姚嘉妮、何廣沛同傅嘉莉領銜主演，監製李添勝，喺2015年9月開拍。呢套劇本來計劃做無綫電視2016年嘅賀歲劇，後來抽起咗改播《公公出宮》[1]，到2017年先至攞返出來做賀歲劇，以半個鐘頭一集由2017年1月9號開始播。呢套劇係黎耀祥繼《公公出宮》之後連續第二年做賀歲劇男主角，亦係監製李添勝喺無綫電視服務48年嘅告別作。
