幫人慶祝生日抑或特別日子？我哋搜羅咗以下高質嘅蛋糕店，總有一間幫到你！
雖然我哋好鍾意食香港嘅點心、雪糕同墨西哥菜，不過試問有啲咩比得上一件殿堂級嘅蛋糕？所以，我哋走勻全港，親自揀咗以下15間蛋糕店，由打卡一流嘅 cafe 到五星級酒店，保證色香味俱全。快啲睇吓你想試邊件蛋糕啦！
全香港最正蛋糕店特輯
1. Sugar Me Kissery
想買個 3D 造型蛋糕嘅話，Sugar Me Kissery 會係一個好選擇。呢間蛋糕舖嘅創辦人係一位得獎甜品大師，專門整外型獨特嘅蛋糕，有創意之餘味道都好高水準。無論你想要幾別樹一幟嘅蛋糕，一班大師都會為你絞盡腦汁幫你訂製。我哋見過 Sugar Me Kissery 最神奇嘅蛋糕係一個懸空嘅 Hermes 紙袋，裡面啲嘢跌晒出嚟㗎！
Sugar Me Kissery，大角咀必發道83號，電話：6110 8967
2. La Famille
唔知大家仲記唔記得喺2014年左右，La Famille 只係一間喺大坑嘅小店呢？冇錯，我哋絕對係佢嘅元祖級 fans！所以當呢間蛋糕店後來擴展到喺全港有成十間分店嘅時候，你可以想像到我哋有幾開心啦。La Famille 嘅戚風蛋糕好受歡迎，無論係皇牌士多啤梨蛋糕、香濃嘅雙重朱古力蛋糕，定係我哋最鍾意嘅日本柚子蛋糕，都不容錯過。另外，呢間蛋糕舖有賣打卡一流嘅巴伐利亞蛋糕（bavarois），仲會時不時推出期間限定嘅商品添。最後，La Famille 每個月都會舉辦生日之星活動。如果你嘅生日撞正舖頭喺 La Famille 社交媒體上面公布嘅日子，你就有機會贏得一個戚風小蛋糕。祝你好運！
La Famille 喺全港有多間分店。
3. 65.cakes
可愛嘅風格、栩栩如生嘅卡通人物…… 65.cakes 絕對係充滿創意嘅一間香港蛋糕店，自2019年嚟一直推出最得意、最色彩繽紛嘅蛋糕。你可以訂造各款造型同風格嘅蛋糕，由經典嘅卡通人物到哈利波特都有，包保與眾不同！
喺 Instagram 訂購 65.cakes 嘅蛋糕。
4. Vive Cake Boutique
Vive Cake Boutique 係甜品愛好者嘅天堂。充滿少女心嘅蛋糕外型令人唔捨得食之餘，加埋鋪頭入面粉紅色嘅裝潢，啱晒你喺 IG 打卡。如果你去 Vive，記住要試吓佢哋嘅獨角獸蛋糕同美人魚尾蛋糕啊！
心郁郁想試？歡迎參考我哋呢篇 Vive Cake Boutique 點評（英文版）。
了解更多關於 Vive Cake Boutique。
5. Jouer
睇 Jouer 嘅特色蛋糕都知佢哋啲師傅幾玩得啦。Jouer 嘅法式甜點固然高質，但係佢哋嘅蛋糕先係真正令人流連忘返。Jouer 嘅招牌蛋糕融合各種平民小食，例如香蕉拖肥、朱古力棉花糖等等，但係整出嚟嘅成品又極之高貴。如果你想再食多啲甜品，Jouer 嘅馬卡龍同貝殼蛋糕都好值得一試㗎。
Jouer，銅鑼灣恩平道28號利園二期LG樓23號舖，電話：3489 3903
6. Infiniti C
Infiniti C 除咗啲蛋糕味道特別之外，仲好顧及無麩質、全素同生銅飲食嘅食客。上圖藍色嘅玫瑰蛋糕係最熱賣嘅蛋糕之一，唔知你喺 IG 有冇見過呢？無論係巴西莓乳酪味定抹茶枸杞味，你一定可以喺 Infiniti C 試到啲新奇嘅蛋糕味道。
Infiniti C 喺全港都有分店。
7. 當文歷餅店
被譽為「飲食界梵高」嘅甜品大師 Dominique Ansel 於2020年開咗佢第一間香港分店，將本地文化融入蛋糕。當文歷餅店啲糕點外型好特別，例如有魚蛋、冬瓜盅、三文治等。有機會嘅話可以試吓佢哋嘅火腿通蛋糕，包你食之前一定估唔到佢究竟係咩味道。
當文歷餅店喺全港都有分店。
8. Jomo
Jomo 出名賣全素甜品。佢哋嘅雪芳蛋糕外脆內軟，面頭有一層厚厚嘅忌廉，更有網民讚係全港最正。喺 Jomo 將軍澳店樓上，客人可以喺佢哋嘅 gym 做完運動之後落去食件蛋糕獎勵自己。同場仲有個靚爆海景添！
Jomo，將軍澳唐俊街23號 Monterey G01 & 1A，電話：2331 3003
9. Ms B’s Cakery
時尚女王郭志怡創辦嘅 Ms B’s Cakery 絕對可以用奢華嚟形容。佢哋出名嘅蛋糕有 Better Than Sex （黑朱古力拖肥軟心蛋糕）、Pink Diamond Heart （Dom Perignon Rose 香檳啫喱配白朱古力慕斯同法式雲呢拿雪芳蛋糕）、Champagne Chocolate and Diamonds（啱啱個 Pink Diamond Heart 嘅朱古力版本）同埋充滿土豪味嘅 Million Dollar Truffle Cake（松露軟心朱古力配拖肥同24K朱古力金幣）。另外， Ms B’s Cakery 仲有提供無麩質同無糖選擇——力推！
Ms B’s Cakery 在港島有幾間分店。
10. 芝樂坊餐廳（The Cheesecake Factory）
自70年代喺美國比華利山成立以嚟，芝樂坊餐廳 The Cheesecake Factory 受到全球蛋糕愛好者多年嘅愛戴。鋪頭有超過30款唔同口味嘅甜品俾你揀，例如士多啤梨芝士蛋糕、南瓜芝士蛋糕、Godiva 朱古力布朗尼新地、蘿蔔蛋糕等。佢哋仲有提供牛扒同沙律等嘅主食，俾你食甜品之前填飽嘅肚。
芝樂坊餐廳，尖沙咀廣東道25號港威商場 G102號舖，電話：2791 6628
11. 文華餅店
想氹人嘅話，不如去文華酒店買件蛋糕，包保夠晒誠意。佢哋所有法式甜點都係每日新鮮製造，並且經過甜品大師精心設計，而「1963文華芝士蛋糕」更加係經典之作。走之前記住買翻罐玫瑰花瓣果醬啊！
文華餅店，中環干諾道中5號香港文華東方酒店，電話：2825 4008
12. Lady M
估計你應該聽過 Lady M 出名賣千層蛋糕㗎啦！一塊塊 crepe 之間夾住鮮甜嘅奶油，帶出獨特嘅鬆軟口感。Lady M 有好多唔同口味嘅蛋糕，好似抹茶、椰子、焦糖海鹽同玫瑰。除咗千層蛋糕之外，佢哋嘅士多啤梨蛋糕同香蕉千層酥都係唔錯嘅選擇。
Lady M 喺全港有多間分店。
13. The Cakery
想食得健康啲，但係又想食甜嘢？The Cakery 專門整無麩質、全素、無糖等嘅甜品，仲用好多奇亞籽呢類有機超級食材，等你食完蛋糕都冇咁大罪惡感。佢哋嘅人氣產品包括巨型太陽花蛋糕（南瓜海綿蛋糕配黑朱古力）、Aloha（無麩質海綿蛋糕面頭有原塊菠蘿切片同厚厚嘅蛋白霜）同埋 Hidden Gem（無麩質黑芝麻蛋糕，上面有一朵黃色好大嘅花）。一個字：正！
The Cakery 喺港島有幾間分店。
14. Date by Tate
講到香港最有特色嘅蛋糕，點少得呢間位於上環嘅 Date by Tate 呢？創辦人話，每一件蛋糕好比一首詩，奪目嘅造型背後有各自嘅意義。啲精品蛋糕夠晒獨特又好味，啱晒買嚟慶祝重要日子，俾啲親朋戚友打吓卡。
Date by Tate，上環荷李活道210號地舖，電話：6730 2494
15. Butter Cake Shop
講起 Butter，我哋除咗會諗起 BTS 防彈少年團嘅名曲之外，我哋仲會諗起 Butter Cake Shop 美味濃郁嘅蛋糕。有經典嘅紐約芝士蛋糕到人見人愛嘅 s’mores 蛋糕，Butter 嘅各種蛋糕同果派將係每個 party 嘅焦點，包保你哋食到停唔到口呀！
Butter Cake Shop 喺全港有幾間分店。
The Vege Lab（已結業）
素食嘅朋友聽住喇！The Vege Lab 嘅蛋糕真係超班㗎，每一件蛋糕都係創辦人 Yuki Chan 嘅心血。我哋特別鍾情於佢哋嘅上圖嘅南瓜蛋糕同榛子朱古力蛋糕。另外，伯爵茶蛋糕、奶茶焦糖海鹽蛋糕同熱情果白朱古力蛋糕都同樣出色。講到我哋都流晒口水喇……
想知多啲關於 The Vege Lab 嘅話，可以參考我哋呢篇點評（英文版）。
The Vege Lab，觀塘觀塘道396號毅力工業中心10樓S室，電話：5332 6500
Cake in a Cup（已結業）
雖然未有一間實體店，但係你絕對唔可以睇小 Cake in a Cup 呢間網紅店！嚟自新加坡嘅店主將家鄉同馬來西亞嘅特色融入佢嘅招牌蛋糕 The Malacca，裏面嘅流心椰子醬係用佢嫲嫲嘅祖傳秘方。如果你鍾意食奶油忌廉同生朱古力嘅話，千祈唔好錯過 Cake in a Cup 嘅蛋糕同紙杯蛋糕。
喺 Instagram 訂購 Cake in a Cup 嘅蛋糕。
Sift Desserts（已結業）
Sift Desserts 嘅全蛋糕同紙杯蛋糕唔單止外型奢華，仲鬆軟又好味，而且佢提供好多唔同口味，由經典嘅 red velvet 同雲呢拿到比較新潮嘅綠茶同海鹽朱古力都有。每逢聖誕、萬聖節同農曆新年嘅時候仲有期間限定嘅口味添。
Sift Desserts 喺全港都有分店。
