前世情人大過天!潮爸譚俊彥為女兒面試周圍撲|即時新聞|繽FUN星網|on.cc東網

前世情人大過天!潮爸譚俊彥為女兒面試周圍撲

20210618
東網電視
更多新聞短片
近年在《十八年後的終極告白》等劇集中被公認演技超卓、更是網民譽為「下一位視帝」的藝人譚俊彥(Shaun),本身是圈中出名的好爸爸,育有現年5歲的女兒及3歲的幼子,湊成「好」字,談到父親節如何慶祝,他直言一向都不太重視節日,所以一家人開開心心食飯,已是他最好的禮物,屆時還可以跟父親狄龍一起慶祝,三代同堂,相當美滿!
憶起與父親回憶
電單車熱愛份子的Shaun,說以前父親狄龍會載他遊車河,這份父子情,他很想延續,奈何被父親潑冷水,他謂:「之前買番我第一架(類型)電單車,想同佢(爸爸)去遊車河,攞車嘅第一日佢都有坐嘅,但實在太熱,同埋兩個男人身體嘅接觸...之後佢就冇睬過我,哈哈!」雖然狄龍「唔睬」,但Shaun會將這份親子情送給兩個小朋友:「我知道小朋友8歲可以坐電單車,到時就可以車個女去跳芭蕾舞。」
愛女大過天
有爸爸駕電單車送返學,型到「跌渣」,Shaun提到一對仔女,則非常感恩,並笑言「前世做了好事」來形容自己心情:「佢哋都好鍾意睇書,囡囡參加任何比賽都一定會攞冠軍,囝囝就好鍾意學習,同埋係一個好有條理嘅人,阿女有啲嘢就似我,成日都好大頭蝦,經常唔見嘢。(認同『求學不是求分數』這句說話嗎?)講就話唔會,淨係阿女入小一呢個過程就已經好漫長,為咗入讀心儀嘅學校,我哋打晒燈做晒功課同個女拍片,出面競爭真係好大,個個家長都拍到好專業,同埋我喺TVB工作6年,拍戲遇意外手掌爆咗縫針,我都冇請假,第二日照開工,但囡囡學校面試就一定要請假。」
淡定如Shaun,去學校面試都變緊張爸爸,十分疼錫仔女的他亦直言希望抽多些時間陪伴小朋友成長,當他們是朋友,笑問Shaun會否願意幫仔女追星?他笑言:「咁我唔會,好老土㗎,因為以前我好喜歡Beyond,有次我爸爸見到阿Paul(黃貫中),就同佢講,我個仔好鍾意你,成日喺房彈你啲歌,我覺得好醜囉,呢啲我會由佢哋自己做。」
雖然仔女還細,但他已為他們計劃將來,買下兩份大額的醫療保險,令他們一世都有醫療保障,他謂:「因為我見太多老人家老咗好多病痛,使咗好多錢,久病床前無孝子,所以,我想佢哋一世都有醫療保障,當然佢哋之後可以選擇攞出嚟做自己想做嘅嘢,呢個就留番畀佢哋自己抉擇。(會唔會想仔女長進,所以裸捐財產等佢哋去打拚?)唔係,我好傳統,一定會留番畀佢哋。」
唔介意女兒同性戀?
Shaun對女兒這位「前世情人」抱着開通的心態,自言不會要求女兒的擇偶條件,是依照他作為標準,反而近年親友一些經歷,令他對同性愛情,有所改觀:「以前就會唔想個女帶個女仔返嚟,但依家諗通咗,覺得只要對個女好、囡囡開心就得。」