彌補不了的遺憾 謝雪心
「個女（珈潁）三歲，我就復出舞台，唔多唔少都忽略咗佢，呢個係我做人媽媽最大嘅遺憾！」謝雪心輕柔的說。
由粵劇花旦轉型成為無綫藝人的謝雪心，縱使即將踏入花甲年華，與女兒珈潁仍似足姊妹花，行善、登台、出席活動有影皆雙，母女情真摯又深厚，卻原來也曾經為愛女留下寂寞的童年片段，彌補不了，「我太快離開佢出番嚟做嘢喇，有次佢買咗我最鍾意食嘅雞蛋仔，點知我去咗記者會覆唔到call，返到屋企，佢喊住同我講：『啲雞蛋仔凍晒喇，冇喇！』咁凍晒我都要食啦，但個女喺度喊緊，自己都食之無味喇。」
人生總有遺憾，慶幸珈潁的手仍舊拖緊謝雪心。
珈潁現在也有參與無綫的一些綜藝節目，至於會否成為無綫親生女，謝雪心則大賣關子：「第一時間通知你呀！」
謝雪心婚後三年才成功懷孕，因此視珈潁如珠如寶，家中長輩也非常寵愛她。
醉心事業
八歲成為任劍輝、白雪仙門徒的謝雪心，是著名的粵劇名伶，至九六年加入亞視，○八年轉投無綫，翌年她憑《巾幗梟雄》「大奶奶」一角獲得「最佳女配角」獎項，她形容自己有如「嫁了給演藝事業」，從一而終，也希望女兒珈潁像她一樣，視演藝為終生職業，不論成就高與低，也要堅持到底。
正因為謝雪心對演藝的熱誠，二十歲結婚、二十三歲產女，三年後，便急不及待重返舞台，「我以為初生嬰兒先需要有媽媽喺身邊，到佢三歲時，覺得佢獨立喇，就放心出去做番嘢。其實三歲點獨立吖？我係有歉意o架，太快離開佢；總之我一投入咗工作，就唔多唔少忽略咗佢，雖然我盡量安排星期日係family day。不過，如果我有表演要做都唔可以陪到個女，我都覺得珈潁陰功o架！」
珈潁三歲前，謝雪心常伴其左右，不過女兒三歲後，她便決定復出舞台，難免會忽略女兒。
謝雪心的丈夫姓陳，為專業人士，作風極為低調，不許太太與女兒公開其身份，而且工作繁重；謝雪心復出舞台，既要重新練曲養聲，又要練妝練功架，難免令珈潁倍感孤單，性格變得沉默又獨立，珈潁說：「自小冇乜人同我傾偈，搞到我好內向，剩係同啲貓傾偈o架咋；同埋我會好夜瞓囉，媽咪夜返，半夜點幾兩點我都扮瞓覺等佢返嚟，因為我知佢一定會入嚟望一望我。」
珈潁強調自己習慣了獨立，性格硬朗，但回想從前，也有傷心的一幕，謝雪心凝望着女兒的面容、扁扁嘴說：「有次佢買咗我最鍾意食嘅雞蛋仔，點知我去咗記者會覆唔到call，返到屋企，佢喊住同我講：『啲雞蛋仔凍晒喇，冇喇！』咁凍晒我都要食啦，但個女喺度喊緊，自己都食之無味喇。佢好似好受傷害咁，覺得我傷害咗佢嘅一番心意，老實講，我仲淒涼過佢。」
