喺《再創世紀》同《使徒行者2》合作過周柏豪同袁偉豪,近期佢哋幫無綫拍嘢,兩位男神一身行山裝備上陣,去咗萬宜水庫好出名嘅蠄蟝石頂,嗰個位出名靚風景不過要上去都唔係易事,周柏豪就話爬上去時令佢諗起一套劇集情節,相信就係《神鎗狙擊》謝天華單手攀石兼講電話一幕,而袁偉豪仲好大膽,坐正喺崖邊腳揈揈咁自拍,真係睇見都心驚!雖然呢嗰位危險系數都好高,佢哋帶齊晒安全措施其實都好穩陣,袁偉豪喺介紹安全帶時失手騷埋個凸腩出嚟,唔知係咪因為近期避疫少咗出去做運動,搞到有咗個小肚腩仔呢?
講開疫情,呢兩位男神好有心,佢哋同朋友喺唔同地方搵咗1萬個口罩等嘅抗疫物資返嚟,而呢批物資將會捐贈到低收入家庭、老友記同埋前線清潔人員,佢哋仲大讚幫手包裝同埋負責派發嘅義工係真英雄。
東網網站 : https://on.cc/
東網Facebook專頁 : https://www.facebook.com/onccnews/