47歲謝天華同 42歲老婆李天恩（ Tina）一索得男，剛為人父的謝天華急急在微博報喜。天天（天華囝囝乳名）出生 5磅半，精靈可愛。
本周一（ 2月 2日），即入院開刀前一天，記者獨家拍到謝天華夫婦在圓方撐枱腳，當時體重達 180磅的 Tina， 48吋巨肚非常誇張。
翌日（ 3日）清晨 7時許，兩人棄用平日代步的座駕，秘密入養和剖腹生仔。據知天華囝囝是 3號辰時出生，貴人多之餘亦好旺爸爸，難怪謝天華錫到燶。
2/2 臨盆前行商場
周一中午，即臨盆前一日，謝天華帶老婆 Tina去圓方商場行街。行咗一陣，謝天華見老婆行到夠皮，於是同佢買雪糕食。兩人一路行一路食，當眾晒甜蜜。
花 60萬搞了四次人工受孕的謝天華夫婦，幾經辛苦終於得米。本周二（ 3日）清晨 7時，謝天華送妻秘密入養和剖腹產子，晚上其好友宋熙年在《東張西望》代為報喜，「謝天華同佢老婆嘅愛情結晶品今日出世，母子平安！」
5磅半天天
全家福
一向恨仔的天華難掩喜悅心情，更揚言要令兒子成為「最棒的男孩」。
未懷孕前，天華老婆 Tina身形甚 fit，為了佗 B，她重了 60磅，認真大犧牲。
蠱惑避記者
本周二清晨 7時許，謝天華為了逃過傳媒追訪，棄用平日代步的座駕，與老婆換車離開寓所去醫院。其間 Tina發現記者在寓所外守候，偷偷反拍記者，更將記者及採訪車 post上 facebook，並說：「今朝 7點幾响屋企樓下……究竟想典（點）呢？？！」
成功秘入養和產子後，中午十二時許，謝天華陪產後與男性友人離開養和，記者上前恭喜他，他竟然搞笑咁答：「我今日嚟探朋友。」說罷即匆匆離開。
48吋巨肚
買雪糕嘅時候， Tina一側身，不經意露出 48吋巨肚。
愛妻號謝天華，沿途當然拖實老婆護花啦！
當日天華泊好車， Tina就一馬當先。連日來足不出戶的她，明顯悶爆。
揀靚時辰出生
3/2 唔認老婆生
周三晨早天華陪老婆入養和生 B。中午 12時許，陪產後的他與友人離開養和到附近用膳。記者恭喜他時，他表示:「探 friend，探親人。」唔認做老竇。
不過，據堪輿學家譚雲龍指出，謝天華囝囝出生時辰甚佳，「早上 7至 9嘅辰時係『合官得貴蛇化龍格』，一出世就行好運，仲好旺爸爸，將來事業有成。」
其實 Tina的預產期為本月中，但自懷孕後，她體重飆升，懷孕 6個月時，已激增 40磅。加上他們篤信風水命理，所以謝天華知道老婆佗仔時，已找師傅替囝囝擇日開刀。當知道 2月 3日是吉日兼好時辰，便決定提早開刀，讓老婆不用佗得太辛苦。
本周一（ 2日），謝氏夫婦趁入院開刀前一天，享受二人世界。當日兩人十分小心，從九龍衞理苑寓所出車時，曾刻意將 Audi座駕慢駛，又在佐敦道突然停車，觀察有沒有記者追訪，之後他們開車到附近的圓方拍拖食 lunch。
停車場「講數」
到達停車場時， 180磅的 Tina挺住 48吋巨肚小心翼翼落車，發現記者拍照的謝天華，即 Laughing哥上身，上前同記者「講數」：「嗱！大家好做，我俾你影，影到夠為止。我覺得咩都有偈傾嘅，你哋有得交差，我食飯食得舒服， OK？ Deal？」記者當然遵守諾言，遠距離拍攝，不打擾兩夫婦撐枱腳的雅興。
謝天華說罷即上前追回老婆，兩人到商場內的食肆正斗開餐，四十分鐘後甜蜜蜜拖住離開。他們經過童裝店舖時，謝天華更忍唔住觀看櫥窗的 BB衫，慈父相出晒嚟。
之後他們繼續在商場搵食，拍拖到 Haagen Dazs買雪糕。據知謝天華平日會勸老婆少食生冷食物，不過 Tina翌日要入院開刀，他亦破例俾老婆「放縱」一次。 Tina食完產前最後一杯雪糕，滿足地由老公護送返家。
謝天華一向恨仔，見到洪天明兒子洪大仁時，更忍唔住肉緊錫面珠。
天華緊張老婆
今年 47歲的謝天華，今回一索得男，但亦因為老婆三高（高齡、高血壓、高血糖）關係，故老婆懷孕以來謝天華的情緒都異常緊張。尤其 Tina臨盆前一個月，他更經常失眠。「天華同啲 friend呻，可能因為第一次做老竇開心得滯，成日瞓唔着。佢話好 enjoy挨埋老婆個肚聽 BB嘅聲，同個胎傾吓偈。佢要成日 check住老婆有冇食『違禁』食物，因為 Tina的血糖偏高但好為食又鍾意食甜嘢呀。我哋從未見過佢咁緊張，個個都笑佢緊張大師。」
42歲的 Tina，是三高產婦，懷孕以來早晚都要篤手指 check血糖，仲要小心控制飲食，難免心情煩躁，情緒波動。不過謝天華就好細心服侍老婆。自 Tina有喜以來，謝天華謝絕夜蒲，修心養性，變身愛妻號。
知情者透露︰「 Tina有咗之後，約親天華食飯，佢都帶埋老婆一齊，怕老婆一個人在家胡思亂想。佢好緊張個 BB， Tina想食熱氣嘢，佢會??佢唔好食。未夠 7個月時， Tina想飲凍檸茶，佢就好冧咁求老婆『唔好飲生冷嘢啦，乖啦！』」
如今 Tina母子平安，看着小生命的出生，謝天華在微博留言，透露初為人父的心情：「筆墨難以形容的感覺實在奇妙。」又話︰「會培養你成為一個最棒的男孩。」看來謝天華終於可以結束這段老婆佗仔恐懼症候群，展開廿四孝老竇新一頁了。
去年十月， Tina同應采兒一齊睇嬰兒用品。當時她身懷 5個月身孕，步伐依然輕鬆。
10月揀奶泵
兩人在一系列嘅泵奶器前研究了近五分鐘，最後應采兒介紹了 Medela的泵奶器俾 Tina，盛惠 3,465元。
這款泵奶器深受媽媽歡迎，唔少餵人奶嘅媽媽都買佢！
31/1 產前兜風
產前精神緊張的謝天華，有時會自己揸住綿羊仔兜兜風，減減壓。
中文名「謝浩飛」
謝天華昨晚出席《浮華宴》首映，他表示囝囝英文叫「Theo」，中文叫「謝浩飛」，希望長大後振翼高飛，放眼看世界。問他會否減產？他說反而要增產，原來一罐奶粉好貴，要努力做事，現在老婆餵人奶。兒子是否跟他餅印一樣？他笑言是「半餅」。
早認生男 B
雖然老婆大肚之後，謝天華一直低調。
不過，初為人父嘅佢，其實近期都忍唔住在微博晒興奮心情，仲暗示一索得男。
自爆愛「男」
早前謝天華上載身穿藍色 T恤的照片，然後高呼:「我愛藍」。藍與男同音，暗示生男 B。
砌名牌 B牀
好友應采兒同小春，送咗張價值六千蚊嘅英國名牌 Silver Cross嘅 BB牀俾謝天華，佢仲開心到即刻砌牀。
明冧老婆
見老婆佗 B辛苦，成日陪住老婆嘅謝天華都有喺微博出手，玩合成照，一人化身四角，暗示做老婆阿四。
補品催谷
為令老婆瞓好啲，謝天華同老婆買咗好多花茶，以及高鈣食品，等老婆補補身。至於 DHA食品，就對嬰兒成長有益，仔乸都照顧到。
囝囝行 40年好運
據堪輿學家譚雲龍指，天華囝囝命格五行齊全，屬「合官得貴蛇化龍」格：「 BB一出世就行 40年好運，仲好旺爸爸工作。佢有天德、月德同天喜三大吉星，做事積極、進取，將來貴人多更事業有成。
「不過 25至 30歲就易有車禍同水險，要小心揸車同游水。呢個時辰出世係冇乜兄弟姊妹星，佢唔似有細妹。佢金木水火土都齊，改名最好有木或有水。」
林峯：希望佢追多個，遲啲要同佢食飯兼玩 B！
梁烈唯：恭喜佢一索得男。希望 BB仔好似佢咁，日日 Laughing！
佘詩曼：小天天果然勁，搶閘跑出，趕得切逗利是
周麗淇：等我返嚟睇下小天天帥定係大天天帥！
陳敏之：BB好可愛呀！恭喜老咪同 Tina！
離巢賺千六萬
在無綫工作了 15年的謝天華，憑 Laughing哥一角在內地有價有市。 2013年他離巢開設自己的經理人公司，並密密返內地拍劇接騷搵真銀，年多已勁賺千六萬。