【明報專訊】無綫歌唱比賽節目《中年好聲音2》評判「伍Sir」伍仲衡今年初在演唱會向女友Ida求婚成功，日前接受TVB娛樂新聞台節目《StarTalk》主持許文軒訪問，透露婚期定2024年春季。
伍仲衡11月入「五」50歲生日，踏入人生另一階段，他說：「𠵱家正準備婚禮，明年春季，在一個充滿春意的季節舉行婚禮。其實好多人都以為我結咗婚，之前去美國只係同王菀之做騷，唔係去拉斯維加斯註冊。我個人比較鍾意同朋友分享，與其話搞婚禮，其實係一個party，一定會有音樂，會有Live Band，叫好多朋友上台唱歌，亦都係我嘅個人演唱會，迫啲朋友聽我唱歌，仲想叫啲賓客畀燈（評分），自己轉出嚟。𠵱家努力減肥，有跟教練，真係好辛苦，希望到時著到件禮服，𠵱家著衫開始鬆番啲。」
最近伍仲衡推出首本《伍仲衡作品鋼琴集Vol.1 》，他表示對鍾意彈鋼琴的人而言，可以擁有一本自己創作作品的鋼琴集，絕對是成就解鎖。他推出琴譜外，還有純鋼琴唱片，透露錄音時有難度，因為平日彈琴10次，次次都不同，這是流行曲好玩的地方，可以即興，錄CD不能太即興，要跟樂譜一樣，每首歌錄音起碼彈30次以上。
娛樂組