度身訂造西裝 最平真係可以好平，甚至HK$1000都唔洗。不過著咗上身之後就發現，一係衣不稱身，一係就著到好焗。有啲人著起套西裝，就好似著起龍袍唔似太子咁，大部分都係出自HK$1000都唔洗嘅西裝，真係得個平字！
明明知道唔啱自己，但又覺得「咁嘅價錢算係咁啦，分分鐘貴嘅西裝都係一樣」，結果就繼續心甘情願地著住套唔啱嘅西裝。
事實真係咁樣？平同貴嘅西裝真係無分別？
圖片來源：HK01
任何裁縫都唔會做蝕本生意，自然一定會係將貨就價啦。喺我哋嘅平台上面，由HK$2000以下至HK$6000以上嘅一套西裝都有，甚至貴到上萬元。其實佢地有咩分別？貴嘅師傅貴喺邊？
布料
唔同裁縫提供嘅布料都會有少少唔同，例如牌子、產地、布料成份等。一啲比較貴價嘅裁縫主要提供國際名牌布料，例如意大利的Ermenegildo Zegna、 Loro Piana同Vitale Barberis Canonico (VBC)。當然唔少得仲有英國嘅Scabal、Holland & Sherry同Dormeuil等等。
圖片來源：Pinterest
如果你本身對西裝無咩研究，以上嘅唔同牌子對於你嚟講都只係火星文。但其實唔同牌子嘅布料，細滑程度、耐用程度、選用嘅材質都會有唔同。更甚嘅係，有啲布料牌子由自家生產羊毛，再織成布料，令質素更有保證。
裁縫提供高級嘅布料畀你揀，咁當然價錢都會高啲啦。如果你未試過，可以去裁縫到摸下布版先，感覺下同普通面料有咩唔同！
師傅手藝
好多人都話某幾款西裝特別可以考驗裁縫嘅手勢，例如格仔／間條西裝、無裡布西裝等，因為呢啲都特別講求師傅由度身、裁布，以至縫紉時候嘅手藝。如果造得唔好嘅話，套西裝一望就會知道出咗事。
以格仔／間條西裝為例，如果造得唔好，圖案就會唔對稱，咁就更加證明咗每個師傅嘅手藝唔同。
至於無裡布或者半裡西裝，師傅嘅縫紉就要好準確，因為本身裡布可以將一啲唔完美嘅地方收埋。如果師傅手勢唔夠好，咁所有瑕疵就無所遁形喇！
除此之外，西裝外套入面嘅夾層都可以好講究。入面究竟係全手鈎朴、半手鈎朴定係粘合朴，都好影響套西裝嘅效果，同樣對師傅嘅手藝有唔同要求。所以唔同價錢，自然有唔同質素啦。
服務
傳統的 度身訂造西裝 非常講究，裁縫會先同你傾計，了解你嘅日常生活習慣，務求令你套西裝無論喺剪裁定係款式方面，都可以配合到你。然後先幫你度身，畀你揀布料，仲可以加上個人化嘅繡字。
西裝嘅模版造好咗之後，就會通知你去試身，睇下初步嘅尺寸合唔合身，睇下有無地方需要改。
西裝製成後，就可以做多次最後試身，無問題就可以拎走喇！如果唔啱就要再拎去改。
圖片來源：fanhungry@unsplash
不過而家唔係全部裁縫都會有晒以上嘅全套服務，大部份只係提供度身同試身過程，最後試身之後如果唔啱，係未必有得改㗎。有啲裁縫價錢雖然比較高啲，但係就會提供比較完整嘅服務，不論售前定係售後，都可以滿足到你嘅需要。
一分價錢一分貨 永遠正確？
平嘅西裝，的確可以好平，但究竟質素係點就見仁見智喇。
雖然收費貴嘅裁縫都唔一定係好，不過整體嚟講，價錢同服務質素都一定有掛勾嘅。如果想搵到有晒完整服務、質素又有返咁上下嘅裁縫，考慮因素除咗有價錢之外，仲有顧客評價！
如果你試過一個裁縫覺得幾好，心思思想試下有無「更好」，又或者仲未搵到同你一拍即合嘅裁縫，咁就要留意喇。
一，你可以先從價錢、地點篩選。
二，再睇下顧客評價同埋推薦程度。
三，同裁縫聯絡，了解下佢哋提供嘅服務。
四，與裁縫預約，確保到時舖頭入面唔會太繁忙，師傅可以好好了解你嘅要求！
五，完咗之後，不妨留低你嘅用後感。你嘅評價都會幫到其他迷途羔羊㗎！
相關文章：
