【Emily】房協紅磡長者屋52開放式單位待租 - 20230915 - 港聞 - 每日明報 - 明報新聞網

港聞

港聞二

【Emily】房協紅磡長者屋52開放式單位待租

【明報專訊】位於紅磡利工街8號嘅豐頤居係房協第三個「長者安居樂」項目,對象係年滿60歲嘅中產長者,提供312個單位,租住權費由120萬至265萬不等。豐頤居提供一站式住屋、醫療護理同康樂設施服務,另設嶄新嘅「智能樂齡緊急支援系統」。房協總經理(銷售及市場事務)柯靄邦噚日話,現時約八成半單位已經租出,包括全數168個一房單位,仲有52個開放式單位待租,市民今日起可預約參觀。

柯靄邦話,自3月開放示範單位後反應熱烈,有超過1萬參觀人次,房協喺上月尾已陸續將單位轉交畀首批住客;輪候冊現約有400宗申請,等緊現有嘅項目同未來粉嶺項目嘅單位,𠵱家做緊資格審查等手續。

粉嶺「長者安居樂」項目料下年度推

房協話籌備緊另外3個「長者安居樂」項目:粉嶺百和路項目(261個單位)預計2024年底至2025年初推出;觀塘花園大廈(204個單位)同筲箕灣明華大廈(608個單位)分別最快喺2033/34年及2035/36年落成。

房協社區及長者服務總監吳家雯話,為更好照顧長者,每名住戶都有一個具定位功能嘅隨身裝置,房間內亦設有緊急召喚系統,提供24小時緊急支援;單位仲提供3項追蹤服務,包括門磁偵測長者出入情况、水表監測用水情况同Morning Call服務。

吳家雯仲話,豐頤居希望幫助每個入住者有一個活躍嘅晚年,除咗設唔同興趣班組,仲設有健身設施、醫療中心等,以助長者「儲健康、儲朋友、儲興趣」。

相關字詞﹕房協

上 / 下一篇新聞