【明報專訊】講起觀塘裕民坊重建，好多人都會諗起裕民坊嗰間麥當勞，都可以話係集體回憶之一。原來諗返起，當2017年8月呢間喺觀塘有36年歷史嘅麥當勞隨住裕民坊重建而結業後，「裕民無當勞」都已經成6年啦，不過情况好快有變。
有觀塘街坊通知小琴，原來麥當勞已經租咗現時裕民坊商場（YM2）一個街舖，計劃今年9月開店。小琴親自去睇過，新舖位於商場近協和街物華街交界嗰邊、其實同舊時個舖位置一個街頭一個街尾，現時個舖位已經開工裝修，圍板上寫住「See you in Sep」（9月見）。
個舖位有成兩層，唔知麥當勞係咪要晒。據觀塘街坊話，呢個舖前租戶係瀛木超市，2021年9月開幕，但開舖一年多就光榮結業。其實近期網絡間都討論過呢個裕民坊商場，話佢係「死場」。但其實個場有好大部分空間都用咗嚟做巴士同小巴總站，真正嘅舖位唔多，仲要拍住觀塘大場APM附近，可能純粹係「有比較有傷害」嘅問題。如果你當佢係一個巴士總站附近有啲商舖咁睇，觀感就會fit好多。
email: piano@mingpao.com