政情:袁莎妮凍齡有術 網友話30年冇變樣 - 東方日報

    政情:袁莎妮凍齡有術 網友話30年冇變樣

    好多人間唔中就會摷番舊相出嚟緬懷吓昔日走過的日子,香港總商會總裁袁莎妮(Shirley)早前就喺社交網站上載其三十年前嘅舊相,有網友就留言話呢幅舊照嘅亮點係Shirley個樣冇變過,似乎Shirley凍齡有術喎。

    Shirley喺貼文話,佢喺收拾時見到呢張相,勾起佢嘅回憶,而呢張相係佢一九八八年簽收獎學金、獲全費資助到牛津大學修讀學士課程時影,當時佢要承諾學成後回港工作,貢獻社會。

    有最好嘅教育係媽媽所賜

    佢又提到,雖然牛津大學係佢生命一個轉捩點,但更重要嘅係好彩喺佢年幼時,媽媽好執着一定要佢哋考入好嘅小學,仲不惜一切咁要佢入讀嘉諾撒聖心書院,得到最好嘅教育,令佢人生走嘅路從此唔一樣嘞!佢仲話,咪睇媽媽有時直腸直肚,有時婆婆媽媽,但其實係小事糊塗,大事精明,每到重要關頭都能夠發揮小宇宙,而佢有今日,都係媽媽所賜喇。

    第一手消息請下載on.cc東網iPhone/iPad/Android/Windows Phone Apps