袁彌明鬧麥明詩前度係「西環契弟」 林作反擊：必須以牙還牙
當負皮王挑戰抽水王，結果會點呢？話說麥明詩早前喺節目講到女人自身價值比男人跌得快，跟住爆喊；袁彌明睇完之後有感而發開po討論，但hashtag咁寫：「當十優港姐遇上西環契弟」暗罵林作。
林作不甘示弱，喺fb抵死反駁：「每次都係你呢啲抽水人提起」、「點解又關西環事」、「我住中環」。
林作回應《香港01》時更加勞氣：「唔通個個隻狗咁吠，都搵石頭掟佢咩！」
林作同袁彌明本來大纜扯唔埋，但係網友經常用負皮王同抽水王嚟形容佢兩個，呢場戰事好難講鹿死誰手，簡單嚟講件事係由袁彌明引發先嘅。話說麥明詩有日喺《後生仔傾吓偈》講到女人到咗35歲就開始跌watt，但係男人過咗35歲事業同身體機能依然會有進步，萬一男人結婚後去滾，女人都要死死地氣啞忍，唔通離婚咩！講完就爆喊流淚。
咁同麥明詩一樣做過港姐又係前人力主席而家嫁得好好嘅袁彌明睇完之後，就喺fb寫咗一大段文字，但文字一開頭就落hashtag「#當十優港姐遇上西環契弟」，然後咁寫：「難道女人不能累積經驗和成就，而男人的身體機能不會下降嗎？」、「男人30歲開始appreciate更沒可能是定律。幾多男人30多歲事業到達樽頸，唔上唔落，公司一重組便失業、脫髮、性功能障礙...」
「【離婚，無咗男人，咪乜都無？】這種想法等於婚姻自殺！幾多女人離婚後才獲得真正的自由和幸福，幾多男人離婚後不是攬住個20歲o靚模，而是妻離子散孤獨終老。」、「又滾又拋妻棄子的男人，無咗笑三聲都嚟（嚟）唔切。」、「任何人把安全感完全託付第三者是最不安全的做法。」最激係呢句：「當十優港姐遇上一個連頭髮都梳到亂糟糟、分手後仲不斷抽前女友水宣傳的西環契弟，對愛情婚姻悲觀也難怪。」十優港姐好明顯講麥明詩，頭髮亂糟糟就令人諗起麥明詩前男友林作啦！
袁彌明同林作fb上開戰，袁彌明暗指對方係「西環契弟」：
林作得悉袁彌明嘅言論之後，亦喺fb還擊，表示根本唔識袁彌明：「其實真係唔係要計較，but Err excuse me, do I even know you?! 人地（哋）感情，需要你咁樣去批判嗎。傳媒點寫，你就信係事實?! 重點係，我不斷抽水？！我已經幾多次用以下方式回答問題了？我咁樣係叫抽水借宣傳 ?! 定係你無事走黎（嚟）批評我更加似係chok noise?! 定係我先係不斷俾人抽水? 定你先係由選港姐到而家都不斷抽人水? 要唔要列返個表俾你呀? 定你自己上網搵返嚟睇? 」陣陣火藥味谷晒出嚟！
林作再加上hashtag：「#每次都係你呢啲抽水人提起」、「#我自己就一直迴避」、「#唔通我即刻反面」、「#我又唔係陳冠希」、「#其實我EQ高」、「#點解又關西環事」、「#我住中環」
袁彌明暫時冇再還擊林作，但係網友就各有支持者。我哋聯絡過袁彌明，但佢表示要問公關，暫時未有回應。林作則回覆：「我引用美國總統特朗普的說話，遇到蝦你嘅人要企喺身保護自己，必須以牙還牙。」但佢暫時只係文字上反擊，佢就咁講：「唔通個個隻狗咁吠，都搵石頭掟佢咩！」林作話冇睇過麥明詩個節目，同埋雖然唔認識袁彌明，但都知佢係邊個但係對佢「冇諗法」，又指責袁彌明：「非常偏頗！佢對我嘅印象係年幾前嘅保留至今。」