SUN世代:袁彌明繼續寸 - 太陽報
SUN世代:袁彌明繼續寸

SUN世代:袁彌明繼續寸

袁彌明敢言,因為她寸得起。○五年參選港姐,○七年與電視台鬧翻,但她沒有從此消失,反而轉戰商界,美容生意愈做愈大。不用睇人面色,夠資格有碗話碗,上至社會現象,下至娛樂八卦,她都敢於批評。此際踩入政界,擺明車馬咬實民主黨唔放:「一黨之綱都可以背棄,仲點叫民主?」

三十歲的袁彌明(Erica)最近聯同電台主持快慢咇、星屑醫生歐陽英傑及香港人網監察林雨陽等人組成「選民力量」,部署參選明年區議會,打正旗號狙擊民主黨。居於港島的她可會狙擊甘乃威?她說:「所有民主黨雙料議員都係我哋目標,我會積極考慮參選。」

「冇包袱做番自己」

民主黨轉軚撐政改,自言是真民主、真普選支持者的她心中有氣:「民主黨成立原因係要爭取民主吖嘛,劉慧卿話自己係硬骨頭,我以前成日捐錢畀佢,但佢哋連一黨之綱都可以反轉,背棄自己,仲點叫民主?」沒有地區服務經驗,參選可會輸蝕?「要論資排輩,奧巴馬都唔會贏啦,我哋出嚟,只係想畀選民多個選擇。」

袁彌明近年「寸」人無數,由陳冠希到陳志雲都被她明批暗踩:「大家茶餘飯後都會講,我只不過公開講出好多人嘅心聲!」甘乃威被女助手指控性騷擾,「呢啲係ugly(醜陋)囉,但唔夠轉軚核突。」

她的確寸得起,○七年因合約問題與電視台擘面,人人以為她冇運行,豈料她利用知名度做生意,由網上寫blog、拍短片推介化妝品,到現在開了兩間店,又代理美容和健康產品,累積生意額已達三千萬元。難怪她牙擦擦:「我咪一樣唔死得!冇咗個包袱仲好,可以做番自己。」

遺傳嫲嫲硬淨性格

講起一台獨大她就勞氣:「美國啲劇行前香港三十年,日劇行前二十年,韓劇都超前十年,點解要當港人白癡?政府有責任囉,咁多年都唔開放發牌,點會有進步!」

敢言的她硬淨性格似足嫲嫲:「佢係教徒,文革前已在內地傳教,但共產黨唔畀,結果嫲嫲坐咗十年監,佢出嚟繼續傳教,又坐多十年,共產黨話肯認錯就唔使坐,但嫲嫲覺得自己冇錯!我夠膽講嘢嘅性格,應該係佢遺傳。」

袁彌明小檔案

年  齡:30歲

學  歷:聖士提反書院、美國波士頓TUFTS大學經濟系

現  職:藝人、「袁彌明生活百貨」老闆、選民力量庶務主任

選美獎項:2005年度香港小姐旅遊大使獎

Money18 新功能「18好路數」為你預測心水股票升跌機會率

袁彌明認為有道理便不怕講,討厭做「偽人」。

選港姐

搞生意

入政壇

Erica曾扮裸體遊行,抗議政府部門獲豁免競爭法。(資料圖片)