【A&M Diary】嚟到weekend就梗係要同M佬拍拖啦！近期，我哋就愛上咗行山，除咗可以親親大自然同呼吸新鮮空氣之外，更加可以鍛鍊身體同減肥添！加上行山徑內亦有唔少打卡熱點，都好適合一家大細嚟上一堂大自然嘅通識科！今日我哋就嚟到香港仔郊野公園，由灣仔峽公園行去香港仔水塘。呢條郊遊路線輕鬆易行，十分適合行山初哥！
由灣仔峽公園行去香港仔水塘，沿路都係落山嘅石屎斜路，而大部分路段都有樹遮蔭，除咗適合行山初哥亦都係一條親子路線，落到去終點就係香港仔，仲可以食吓嘢先返回市區。如果好似我哋咁，選擇揸車嚟嘅，就可以將車先泊喺灣仔峽公園外嘅咪錶停車位，但行到去香港仔水塘就要沿路折返喇！
提提你
1. 由灣仔峽公園起步到香港仔水塘，沿途係落山石屎斜路，適合行山初哥同一家大細，但都要量力以為
2. 灣仔峽公園設有小食亭同洗手間，但沿路就再無士多補給站，大家記住自備所需用品
3. 大家記住保持環境清潔，自己垃圾自己帶走，絕對唔可以破壞大自然環境
前往方法
1. 乘坐新巴15號巴士，至灣仔峽道站下車
2. 灣仔峽公園設有咪錶位，自駕人士可以泊喺呢度，夠晒方便
灣仔峽公園
公園面積唔算大，但有涼亭、野餐檯凳、小食亭同洗手間，加上係唔少行山路徑嘅中途站，絕對係行山人士嘅補給休息地方！喺公園旁邊就係香港仔郊野公園嘅入口，前往香港仔水塘。
香港仔郊野公園
郊野公園內當然唔少得野餐同燒烤地點，仲有石卵路同健體等設施，加上香港仔自然教育徑內有好多紅膠木、大頭茶、錫葉藤同其他藤本植物，亦係一個學習同了解大自然嘅地方，所以一路上都唔會覺得悶。重點嘅香港仔水塘亦位於郊野公園內。
香港仔水塘
分為上水塘同下水塘，當時興建水塘主要為鴨脷洲同港島西區提供食水，香港仔水塘總容量為126萬立方米，而上水塘水壩、石橋、水掣房同下水塘水壩被列為法定古蹟。
香港仔上水塘
因為依家係秋冬季節，所以水塘嘅水唔多，喺上水塘主壩行嘅時候就見到著名嘅石橋。主壩好宏偉，而拱形嘅石橋亦都非常靚。但如果春夏雨季嚟嘅時候，水壩就會排洪，行嘅時候要特別小心。
