食飯鍾意食埋景嘅朋友留意!平時BBQ都係食個熱鬧氣氛,西貢呢個BBQ場就唔同啦,佔地約2.5萬呎,可以容納過千人。重新裝修後煥然一新,對住無敵海景之外,場地以白色為主調,地下鋪上草皮地,仲有間玻璃屋畀大家打卡,黃昏時間開始會著埋燈添,真係夠晒chill啊!
想喺玻璃屋範圍內燒嘢食的話要加$200開爐費,一大班人除的話每人都係幾十蚊,都幾抵㗎!另外玻璃屋每一對門都可以自由移動,咁就唔怕空氣唔流通,可以安心BBQ啦~
戶外環境同樣對住海景,環境一樣咁舒服。
食物方面採用任飲任食制,最平$188就食到。基本上都幾多選擇,肉類有多款調味雞中翼、雞全翼、雞扒、牛扒、豬扒、金沙骨、豬頸肉及雞腎等,另有丸類、蔬菜、麵包等。
如果想食豪啲嘅話,就一定要食海鮮拼盤啦。雖然海鮮要另外加錢,但佢哋嘅海鮮係每日新鮮採買,燒嗰陣仲郁郁吓,保證新鮮!大懶蟲唔想自己燒,加$50有埋專人幫手燒,仲調埋味添㗎~
未夠喉?現場仲有得即燒乳豬($680),大約需時60分鐘,最後仲會人手拎住嚟燒,咁樣外皮先會夠香脆,點埋自製乳豬醬食真係好惹味!溫馨一提,想食海鮮同乳豬都記得預先打去預訂。
黃昏時間可以喺燒烤場睇埋日落,而且玻璃屋會著燈,多咗份浪漫感覺。
玻璃屋可以租借作宴會場地,無論係婚禮定私人宴會都咁合適~
地址: 西貢大網仔路沙下村9號地下
文、相、片:Yanica