TVB人氣處境劇《愛．回家之開心速遞》雖然無用上一線巨星拍攝，就算有「歐陽波比」都只係客串，不過其實劇集多位女星都係香港小姐出身，美貌與智慧並重，除了大小姐（林淑敏 ）和熊若水（呂慧儀）之外，大家又認到幾多個曾經參加選美競選的佳麗？
登入 瀏覽本網站，可獲取積分換領專屬優惠
點擊查看專屬優惠
愛回家港姐1.「熊心如」蘇韻姿
睇慣咗蘇韻姿演「學霸」就以為佢係書蟲？其實佢中學就主修戲劇，副修音樂，對演藝工作大有興趣，於2016年參選港姐獲得殿軍，有樣有實力，同年入讀埋演藝進修班。
翌年即於《愛．回家之開心速遞》擔演主要成員，火速入屋！而佢仲有演過《誇世代》同埋《白色強人》等人氣劇！
愛回家港姐2.「熊若水」呂慧儀
「熊家」一家仲有另一港姐，花名「長腳蟹」嘅呂慧儀做過工展小姐冠軍，後來於2006年參選港姐仲拎埋季軍。
加入TVB後有出演憑《原來愛上賊》角色獲飛躍進步女藝員，不時演刁蠻角色，於《開心速遞》演愛名牌嘅率直中女「熊若水」就相當搶鏡，先後與「博士」、「Max」及「龔燁」有感情線，仲被「曹總」明戀，幕幕都係焦點！
現實生活中，呂慧儀與拍拖十年嘅黃文迪結婚後生下一子，婚姻維持7年結束，近期傳同「龔燁」張景淳暗撻。
愛回家港姐3.「Bonnie」林凱恩
同「熊家」成員「金城安」有關嘅「Bonnie」亦曾於2015年選過港姐。
林凱恩為彌補媽媽後生時要照顧屋企而無法圓夢選港姐嘅遺憾，決定出戰《香港小姐》，最後獲封「友誼小姐」，跟手加入無線！
除於《開心速遞》與「池美麗」爭仔，仲有參演過台慶劇《降魔的》。
愛回家港姐4.「年輕熊尚善」簡淑兒
「熊家」當中嘅「熊尚善」滕麗名於現實生活中曾有港姐夢，不過家人反對而唔成事，反而於劇中演佢年輕版嘅簡淑兒就曾於2012年參港姐。
雖然落敗，但加入無線仍大有發展，大前年於《愛．回家之八時入席》晒招牌無辜笑容出晒名，繼而於《開心速遞》再出動！
愛回家港姐5.「大小姐」林淑敏
去到「接龍集團」，首先有「大小姐」林淑敏早於2000年就選港姐，曾獲「網上最奪目小姐獎」。
後來轉日本電視台做幕後工作，2002年加入TVB，接過不少負面角色包妓女及情婦，憑《仁心解碼》邪教教徒角色及《On Call 36小時II》「虹虹」一角備受注目，「大小姐龍力蓮」更成為佢招牌作！
愛回家港姐6.「欣欣」邵珮詩
邵珮詩自小於溫哥華長大，身材fit爆嘅佢於2012年就參選當地嘅華裔小姐比賽獲亞軍，卸任後即於2014年選港姐，大熱橫掃「冠軍」、「最上鏡小姐」及「友誼小姐」3個大獎。
再代表香港出戰翌年嘅國際中華小姐競選，最後獲得亞軍，完全係選美女王！佢仲成日於喺Instagram派福利，真係好大方！
佢於《愛．回家之開心速遞》中演率直又傻更更嘅秘書「欣欣」，前年離開劇組，粉絲勁唔捨得！
愛回家港姐7.「Mandy」謝㺭圻
另一個現時已離開劇組嘅角色同樣係選美出身，佢就係「大小姐」秘書「Mandy」。
原名謝芷倫嘅謝㺭圻早於2012年加入香港電視網絡，兩年後選港姐並打入決賽，雖然最後三甲不入，但於比賽中大晒口才而獲主持讚賞。
她翌年加入無線，「Mandy」於劇中與「博士」一段情成為熱話，令佢人氣急升！不過二人已經離開劇組接下新劇。
愛回家港姐8.「Icy」岑杏賢
近期於劇中同「KC」歐瑞偉有段忘年戀嘅岑杏賢於2012年選港姐，獲得「最上鏡小姐」、「最佳首飾演繹大獎」以及「時尚目光獎」。
加入無線後雖然作品唔多，但與「香港先生」袁偉亳一段情就備愛關注，二人分手後再見亦是朋友！
岑杏賢最近於《愛．回家之開心速遞》再次成焦點，盲目愛「KC」仲不惜扮埋MK女，最終打動對方！
愛回家港姐9.「細龍太」陳偉琪
早排因為要去美國參加豎琴比賽而暫別劇組嘅「細龍太」陳偉琪早於2011年參加《溫哥華華裔小姐》並奪得亞軍，兩年後返到香港選港姐，總排名第5，加入無綫電視藝員訓練班後，曾出演過首輯《愛．回家》及《愛．回家之八時入席》，另外演過多個閒角，最後憑「細龍太」上位！
陳偉琪堅係「美貌與智慧並重」，身材Fit爆被封新一代「咪神」之外，仲識彈豎琴以及鋼琴，而且曾為溫哥華市長於選舉中助選！
愛回家港姐10.「楊洋」劉思希
於美國畢業後曾任市場總監嘅劉思希2009年回港選《中華小姐環球大賽》，獲封「友誼小姐」，兩年後選埋港姐並加入無線，於《忠奸人》與吳卓羲演過情侶，於《開心速遞》就出演打理「威龍百貨」嘅「楊洋」。
唔講唔知劉思希邊拍劇仲邊自資137萬港元修讀EMBA課程，最後憑8A成績畢業，完全係學霸，《開心速遞》拍檔都有出席佢嘅畢業禮！
愛回家港姐11.「Mollie」葉凱茵
曾有無線「秘書王」之稱嘅葉凱茵2002年選港姐，落選後加入無線拍劇，入行後曾做秘書嘅佢堅密密演秘帕，去到《愛．回家之開心速遞》升呢演營運總監「Mollie」，同「大小姐」都有對手戲，不過角色已經好耐冇再出現！
葉凱茵早年曾與李思捷拍拖，分手後於2009年與郭家樑結婚，兩年後生下一子，不時於Instagram晒天倫樂！
愛回家港姐12.「三太太」樊亦敏
《開心速遞》仲有1991年港姐出身嘅樊亦敏，佢當年以20歲之齡參選，獲「最上鏡小姐」獎。
她更拍過純爆嘅「陽光檸檬茶」廣告，佢曾一度離開無線北上及於亞洲玩視發展。
7年前回歸無線，近年於《開心速遞》演刻薄三太太，成日爭寵，相當搶鏡！48歲嘅佢早前公開素顏照仍然好養眼，被網友大讚係凍齡港姐！
愛回家港姐13.「龍作蜜」何艷娟
2014年港姐出身嘅何艷娟就夠晒矚目，獲得季軍嘅佢加入無線後出演過不少奀角，於《愛．回家之開心速遞》就演「龍作蜜」一角。
不過劇中表現就冇現實感情生活咁精彩，佢去年與年紀相差40年嘅澳博營運總裁吳志誠結婚，今年宣布「爺孫戀」玩完，再被爆撻著知名教育家陳樹渠嘅55歲長子陳燿璋，人生如戲咁「驚喜」，令全城熱話！
愛回家港姐14.「朗拿度老婆」林漪娸
《愛．回家之開心速遞》近期仲有頭兩輯《愛．回家》角色客串送驚喜，當中包括同樣係港姐出身嘅林漪娸。
後來出演過多部劇集包括《刑事偵緝檔案》及多部處境劇，近年與徐榮於《愛．回家》演恩愛夫妻入晒屋，客串《開心速遞》演「朗拿度老婆」令粉絲紛紛表示掛住「馬家」！
佢於1980年參選，中途一度退選，但仍有加入無線。
香港小姐2019舉行在即 ，屆麗們將來也可能會加入《愛．回家》的大家庭。