溝女王變薯嘜仔　譚永浩用成個月調整心態

無綫藝人譚永浩（Jarryd）在劇集《福爾摩師奶》中飾演「薯嘜仔」，性格內斂膽小又老實，中段染上不良嗜好，之後戒毒所火燭，「薯嘜仔」死過翻生，角色甚有發揮機會。他說：「呢套劇係我第一次正式入劇，第一次接到一個有成長嘅角色，初時仲未完全投入到，開拍咗一個多星期後就開始習慣，開始覺得自己就係薯嘜仔，加上香廬嘅戲份基本上係一個月不停拍，每次成班香廬街坊都會一齊，大家日見夜見，感覺好似一家人，記得當時早上我要參與《X偏方全民拆解》節目拍攝，晚上拍攝福爾摩師奶，每日都好似穿越緊時空咁。」

值得一提的是，Jarryd早前在《救妻同學會》飾演情聖PatPat，經常打扮得型一型，跟「薯嘜仔」相反，兩個角色令觀眾看到其可塑性，Jarryd說：「拍完《福》之後拍《救》，兩劇相差一個多月時間，但角色性格係極端，《救》PatPat係Party Animal，貪玩又喜歡溝女，同薯嘜仔好唔同，我足足用咗成個月時間去調整心態，但係原來嗰種抽離一個角色再去投入另一個角色嘅過程，係幾好玩幾有趣，我好享受呢種感覺！」