【now.com】除咗跟屋企人返鄉下，我咁大個仔未試過去其他地方，就算近如澳門，亦冇去過。所以有次拍嘢要上飛機，就鬧出一個笑話。
話說當時過關，我見大家將電話、銀包擺喺個紅色膠盤，就有樣學樣，然後行過檢查儀器，結果發出清脆嘅「嘟」一聲。跟住就有兩個海關埋嚟，帶我埋側邊再檢查，同我講︰「冇事嘅！冇事嘅！」
我完全唔知咩事，點可能唔驚？腦細陳強深明世事，又知我不識世務，立即估到咩事，就跑返轉頭同我講︰「Dickson，你拎哂啲散銀出嚟先。」嗰刻，我就明白，原來將電話同銀包擺喺盤，係因為佢哋屬於金屬類，而散銀同鎖匙都係金屬，都要擺埋喺盤，大鄉里出城，認真瘀爆。
好多人問我︰「點解從來唔去旅行？」原因好簡單，因為我覺得呢個行為太奢侈。可能我之前做馬經，得8千幾蚊人工，每當喺網睇到朋友去旅行，心就會諗︰「咁辛苦做一個月，先得8千蚊。去一次台灣，已經唔見咗一個月人工，又唔見得特別開心，人生又冇因為呢次旅行有所改變，又冇女仔陪，去嚟做咩？」結果，就養成咗唔去旅行嘅習慣。
後來去咗製作公司，負責跟一本雜誌，內裡有個欄目同旅遊有關，但我冇去過旅行，點搞？傻豬嚟嘅，正如100毛小電影《做隻出色的馬仔》嘅雄哥話齋︰「寫晨操要去馬場，寫星座運程唔通又要上太空？」旅行專欄都係一樣，我雖然未去過杜拜，但只要上維基，就會知道杜拜有咩玩。
早前，由於做《黑紙》，去咗訪問回港宣傳新書《圖文不符》嘅蔣雅文，期間聽佢講咗好多台灣嘅風土人情。對於台灣，我比較熟嘅係台南，相信聰明嘅你哋已經估到，冇錯，就係因為魏德聖嘅《海角七號》。呢套電影係我最喜歡嘅十套電影之一，每次睇完都會覺得︰只要我去嗰度定居，話唔定有機會追到個日本女朋友，不過，我依然故我，只有FF，冇真正去過台灣。
之不過，我近期心態有變，好想離開香港去其他地方睇下。點解？是咁的，因為最近打開Fb，發現咗一個現象，就係睇女神們嘅FB，一定有一打旅行相。我不禁懷疑︰唔通個個女仔都鍾意去旅行？又不期然將自己媾唔到女，歸咎於冇去旅行。唔……睇嚟我都係要行出第一步先得。
獨的格言︰讀萬本旅遊書，不如飛轉台灣……至少，女生係咁諗。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB： https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場。
