今次谷草A欄再次延續數據,全晚仍以守好位具爆發力賽駒表現最佳,部分賽駒先慳後移出有得衝,但當中七場頭馬均排1至6檔,可謂難以挑戰A欄檔位。騎練方面,蔡約翰馬房在季初表現確實不對辦,羅富全則回氣階段,另外表現較差的有「希斯配嘉里」這對組合,絕對會由人而棄馬。
第一場
「令才」如果計到此駒沿途有欄就可以揀,多得「電路七號」慢閘兼欠前速下變得好跑,但贏馬時間比起三班頭馬「八心之威」快0.27秒,扣除頭場場地偏快因素,仍有轉倉後開竅之勢。「電路七號」陳嘉熙難拍告東尼碼頭。「想見你」同造快時間,只係進幅不及對手而已。「胡椒軍曹」梁家俊力鞭下力保第三,維持應有水準。「靚蝦女」起步唔快,再一次因排檔欠佳而珊珊來遲,末段衝22.55秒屬前快後快,希威森賽前操過,睇下仗會否換人。「特攻」雖上次潘頓力鞭贏唔到,但減2磅換嘉里嚴重走樣卻不太合理,睇跑第五的完成時間則只係輸在對手太強。「飛雲錐」不只一次指係水馬,縮程更難。「祥華孝寛」跟試閘表現一樣咁差。「銀河飛馬」梁家俊棄騎,跑落似健康再出問題。
第二場
「晉神」遲開操係有隱憂,不過蘇兆輝轉彎移出外疊頗蝕,如把握何澤堯匹「前風」必定外移的情況下從貼欄位攝上,必定更近,只怪蘇兆輝唔夠熟悉何澤堯,但累積同程轉配備第五次上名。「杭州飛輪」班德禮拖後埋欄發揮佳,但更出色的是取了「晉神」應走跑線,技壓蘇兆輝,本身四班略超,跑到氣管多血照衝入Q。「喜駿之星」步速係快,但起步應聲彈出都難以留住鬥後勁,展開了馬房全日零上名的序幕。「嘭嘭聲」目標下場落五班縮程。「好好彩彩」又一匹梁家俊知道跑唔番而無揀。「紫雲冰」守到好位鬥衝當然贏得合理,完成時間貼住標準則中規中矩。「前風」何澤堯重磅馬一向不穩,睇稍後體重能否回升。「桃花多」抽到好檔再諗。「快勝的」希斯新馬初出揀在谷草上陣唔可信,累計25匹只有2季。「爪皇箭火」賽前無閘,現時未落鞭都開始拂尾,性格古怪。
第三場
「八心之威」讓喘鳴馬休息兩個月上陣確實有必理,今仗起步唔快一樣衝贏,皆因對手太水,完成時間不及「令才」則反映評分開始見頂。「輗多福」操得少兼缺課照放到一席第三,可見對手真係太差。「齊心同行」跑第二水準不高,期待轉跑泥地。「佳運發」唔係正宗短途馬。「高明駿將」跑一千米但早段用順其自然跑法點追。「龍騰飛翔」黃俊先拖後再靠一步不蝕下攝個第四,已盡所能,泥地更佳。「旭日光」中段出錯脚兼外閃,但卻要先改善起步問題。「張燈結綵」及「過河勁卒」一對蔡廐馬差到唔似真。
第四場
「吉利大勝」上季在817場次贏馬水準甚強,故今場仍能包辦三甲。「仍然贏」則在819場次跑第第五屬低水準,落班捱打都能解釋得到。「純金酒杯」爆發力遠勝五班馬,贏馬時間一般可歸咎步速唔算快,馬房近期有匹「蟲草之凰」升班照取得連捷。「精算赤焰」巴度一步不蝕下交出應有水準,增程千二米會更佳。「鑽飾翱翔」沿途三疊衝近,轉倉後見進步。「有苗頭」偏唔用減磅騎師,自尋死路。「友誼至佳」體重偏高兼路短。「天天智庫」難得遇上正常步速卻起步即食三文治,唯有當無跑過,不過重申以往跑千二米其實水準較好。「開心蔬菜」起步撞人後自己散散地。「超班」跟前留後都未得過。「大道至簡」要跑一哩以上。
第五場
「南莊加好」初出例入Q,今場都係,但就係難贏。「各取所需」希威森就係驚沿途唔騎會停,所以變相自己領放,有別以往。「蒲俠超得」喘鳴無止境,至少都要跑一千米才開始研究。「明駿福星」如果叻啲都已經跑第二,等氣量加強。「勇進齊心」熱身性質,末段塞塞地才影響名次。「人和家盛」彎位被頂出三疊已蝕唔起,賽前無閘亦大啟示。「三生好運」直路無咩望過空。「國士無雙」巴度排外檔就係可以跑到咁差。「健康心靈」試馬性質但有追。「三劍俠」贏在對手水鬥水。「勇眼光」均速馬末段鬥輸。
第六場
「請飲茶」上手用完即棄,方仔竟然接手,結果流鼻血加心律不正。「成才」排內檔唔放,浪費檔位。「創建群英」終於賺番一次慢步速,可惜最後玩脷失Q,潘頓排外檔放頭馬其實經常值搏。「信心滿滿」沿途守好位,蔡明紹末段就住就住都追過潘頓入Q。「勁叻仔」飛數異常強勁,憑新鮮感縮程贏馬,蘇兆輝亦跑啱晒,幫自己連捧兩盃,亦幫到馬房爭取四班頭馬抵讚。「龍戰士」劣勢追個第四,跑此程排內檔長期都要兼顧,老馬但轉倉有權進步。「鎂之妙」馬房全日欠攻勢下,有些少藉口。「贏盡天下」早已選擇留後,但其實步速早已預料偏慢。「躡景追飛」面對十級難度,邊個貼佢都係心口掛個勇字。
第七場
「怪獸奇兵」頭段快0.69秒,敗象早呈。「全民皆知」同蝕偏快步速。「包裝風雲」臨場睇飛數便知會出擊,稍蝕步速但守在包廂位好跑,賽前欠大閘都照能上名,下場仍可博打疊。「燊榮之星」谷草特佳馬會長近。「寶賢得得」一再指在谷戰展現極佳平衡力,今場贏馬時間快標準半秒為全晚最佳頭馬,上季尾轉跑田草及增程跑谷草千八米屬假敗績。「忠誠駒」睇羅富全是否繼續固執唔肯增程。「浪漫組合」跑千八米最佳。「二雋」狂操但遲遲唔出賽,陰陽怪氣,最佳拍擋係田泰安。「瑪神滿紛」搵食位四班才會動手。
第八場
「五門齊」轉場明顯想恰對手,但不敵田草千四米可以跑近的「美麗邂逅」。「美麗邂逅」手持在759強組跑第四賽績,循序漸進出頭。「常常有餘」又一匹何澤堯負重磅馬三甲不入,見怪不怪,直路撞唔開「五門齊」望空,下場應會換人。「鴻運飛鷹」起步稍慢,本身極需要儲新鮮感,在暑期重上從化吸仙氣後即跑得好,可惜早段落腳太慢,其實跑千四米會更合。「量化歡騰」跟「八心之威」實力非常接近,後駒可以再贏,此駒沿途走外疊跑近亦合理。「勇趣」爆發力非強,在三班蝕唔起外檔。「紅酒之寶」近仗完全無試過蝕快步速,今場多快馬下放急自然會斷。「平海歡星」又有排唞。「天行健」上季贏馬時間偏慢,有無再進步要跑過先知,但馬房全晚無開門。「其藝先鋒」暫時只有薛恩可以沿途順走,加上唔鍾意沿途前面有馬,賽前已知相當難跑。
9月11日
「樂天派」、「八威小子」
9月14日
「靚蝦女」