潮籍富商兼全國政協馬介璋的兒子馬鴻銘，與玩具大王長女蔡加敏結婚一年多，婚後兩夫妻銳意擴大生意版圖，先是蔡加敏連開兩間名牌手袋店，分店更選址在老爺位於深圳的佳寧娜廣場；上月馬鴻銘又在外父蔡志明旗下的九龍城廣場，斥資過千萬開佳寧娜潮州菜館分店。

「佳寧娜」潮州語解作自己人，一家人互利互惠，拍住上，「自己人梗係要支持吓。」馬鴻銘坐在新開的佳寧娜菜館說。

識食是馬鴻銘的強項，為了食好嘢，他甘願穿州過省尋找美食。成家立室後，看不過眼老婆對食無要求，向她進行特訓，「她以前乜都食，食到飽就算，跟咗我之後叻咗，識得有要求，唔會乜都擺入口。」

說畢他更親自走入廚房，示範兩個拿手小菜：黑椒雪花牛肉粒及醬爆露筍炒帶子。三兩下手勢，兩款小菜上碟，色香味全：「我煮嘢食好大陣仗，唔鍾意求求其其一餐，無要求做唔到呢行。入得門口（食店）就要食好嘢，唔好求其食完就走。」

馬鴻銘和父親馬介璋的飲食習慣近似，每朝以一條煎魚和白粥做早餐，食足十九年，「我鍾意食魚，尤其是馬友、鷹䱽和紅衫魚，食嘢好少會受人影響，要自己鍾意先至食得落。」

金舌頭

馬鴻銘一手拎起重量級的大鑊，用鑊鏟兜兩兜，就炒好醬爆露筍炒帶子，自己上埋碟。

馬鴻銘婚後第一擊是將旗下的潮州菜館擴充，更選在外父旗下的九龍城廣場開分店，面積一萬三千呎，投資過千萬，逆市投資，馬鴻銘預定要守，「相信要捱一段時間，呢區有好多潮州人，但就無乜高檔的潮州菜館，應該有得做。」

酒樓上月十六日開始試業，事事緊張的馬鴻銘，差不多每日到酒樓監督試菜，大至鮑魚、魚翅，小至酸菜、ＸＯ辣椒油，全部經他一張嘴做品質檢定，「我對食好有興趣，唔係乜都擺落口，一食就知好唔好食。」 簡單如一碗魚蛋粉，他同樣有要求，說時更即叫一碗讓記者試味。他認真說：「我唔食出面的魚蛋粉，因為唔好味，佳寧娜的魚蛋是每日自己新鮮整，無味精，你食過就知乜嘢是好味。」

訪問當日碰見馬鴻銘外父蔡志明前來試菜，為女婿打打氣，他三句不離本行，為商場宣傳，「記得提九龍城廣場呀。」	馬鴻銘熟悉酒樓架步，帶記者參觀廚房，隨手捉隻特大花蟹畀大家睇，「我鍾意入廚房樣樣睇吓，分好多個唔同部門，有點心部、鵝檔、海鮮部、魚檔，細個成日畀人趕番出來。」

有天份

父親馬介璋在八二年開設首間佳寧娜酒樓，馬鴻銘不時走入酒樓廚房偷師。中二到美國升學後，竟無師自通當上一家之「煮」，經常煮飯給妹妹食。他得意說：「我天生有呢方面天份，第一次是煲雞粥，去唐人街買雞，自己斬雞，好簡單，無難度。」

假期他又會同朋友周圍試菜，愈食愈嘴刁，為了食好嘢，不惜長途跋涉，由紐約駕車到加州的Napa Valley來回七小時，到著名的France lounge食法國菜，還要預早一個月訂位，他回味說：「嗰度樣樣都好好味，尤其是鵝肝，開埋支酒每個人成千幾蚊，仲未計油費。半年至食一次，因太貴！食完再去參觀酒莊。」

男主外

馬鴻銘在上月中旬酒樓試業至今，經常在酒樓打躉，不是請朋友來試菜，就是同總廚商討改進菜式，「一個月有廿日喺度，好忙，老婆放工就過來食飯，食完一齊返屋企。」

食得奄尖的馬鴻銘，笑指太太蔡加敏過往食得求其，只為填飽個肚，「她求其行入去一間酒樓點菜就食，唔諗好唔好味，食飽就算。」

馬鴻銘實行對太太再培訓，帶她到旗下酒樓試食，又經常拍拖到外國旅行飲飲食食。如到法國生食極品青口歎白酒，又會去北海道食最鮮味的雞泡魚，從而提升太太對食的層次，「香港無咁多好嘢食，外國多啲。太太以前乜都食，跟咗我之後叻咗，識得有要求，食得好嘢多，家唔會乜都擺入口。」八個月大的囡囡靄翹盡得其真傳，馬鴻銘甜到漏說：「囡囡好為食，似足我。」

潮州人出名家庭觀念重，主張男主外，女主內。對於太太正職在外父的旭日國際任副主席，又同妹妹馬慧敏開名牌手袋店Hot Square，五個月內連開兩舖，馬鴻銘坦言最想加敏成為全職馬太，專注家庭，「希望她到囡囡讀小學就唔做，不過要看她意願，無得迫。我未同她講住，我知她好鍾意工作，希望我可以改變到她。」

馬鴻銘否認自己大男人，只是錫老婆。就算四大長老不時「催生」，他都主動出手擋駕，「（生ＢＢ）太頻密對身體唔好，唔使咁急，我仲後生，慢慢來。」難怪加敏曾公開大讚其是好老公、好爸爸，「John對我好好又好錫ＢＢ，換片沖涼全部都識，有幾次ＢＢ嘔奶，整到他件衫污糟晒，他都無所謂。」

	法國Parmesan芝士堂煎鮮鮑 中西合璧的特色菜，有重芝士味，仍保留到鮑魚的鮮甜味道，曾在深圳飲食協會比賽獲金獎。 原價$680　開張價 $480
	菊花石榴燕 以生拆蟹肉和燕窩作餡，味道清新。 原價$88　開張價 $48
	羊肚菌響螺燉排翅 矜貴的響螺和排翅，配以意大利羊肚菌，身價不比黑松露菌便宜，營養價值甚高。 原價$428　開張價 $268
	羊肚菌汽鍋雞 以鮮雞和羊肚菌炮製，營養豐富，冬天食完暖笠笠。 原價$68　開張價 $38

志願從商

識飲識食的馬鴻銘，興趣是食盡天下的美食，每次去旅行他一定買當地的美食指南，同老婆一齊品嘗，「香港反而無，粵菜自己都識整，外國就多好嘢食，我要求好高，唔好食唔會擺入口。」

自言不是含着金鑰匙出世的馬鴻銘，自小由祖母照顧，直至六歲才與父母居住在黃大仙公屋。父親馬介璋由裁縫學徒，死慳死抵儲夠錢開製衣山寨廠起家，家境好轉，一家人才搬去九龍城。馬鴻銘作為長子，父親對他期望甚高，「老竇好嚴肅，對我特別嚴格，千祈唔可以學壞，以前他會主動問補習老師，知道我唔留心就會打。」

眼見父親為頭家，日忙夜忙，懂事的馬鴻銘升讀紐約大學時，主動選一科幫到手的工商管理系，「老竇無強迫我，是我自己興趣，自細已經知道大個會從商。」他畢業後順理成章返公司幫手，現職為佳寧娜集團董事總經理，但他謙稱未必會由自己接班，「老竇咁辛苦創業出來，如果我未得，一定唔會交畀我。」

三歲生日的馬鴻銘，在學校與其他生日的同學仔舉行生日會，興奮切大蛋糕。

馬鴻銘在中二已隻身赴美留學，廿三歲的他，穿上當年時興的花恤衫在紐約街頭拍照留念。

身為老大的馬鴻銘（中），當時十五歲是家中的小大人，要睇實兩個妹妹、弟弟、堂妹和堂弟，一個都不能少。	馬鴻銘在東華十年，於02年正式擔任主席，父親馬介璋和母親馬張蓮嬌親身到場支持兒子行善。

久經馬鴻銘的訓練，蔡加敏和囡囡馬靄翹Chelsi變得識食又為食。