蓋世寶回巢主持《童你一起長大了》不滿貨不對辦 直言難有下次合作機會

42歲蓋世寶1996年加入TVB，一心想做演員嘅佢卻被安排主持兒童節目《閃電傳真機》成為「LuLu姐姐」，之後仲有份主持《至Net小人類》到《放學ICU》，成為元老級兒童節目主持。2019年蓋世寶不滿續約薪金，決意離巢，但又喺今年回巢主持《童你一起長大了》，被網民吐糟食回頭草，不過蓋世寶最近接受電台訪問就提到今次合作得唔太愉快，難再有下次合作機會。

蓋世寶回巢與舊拍檔譚玉瑛、黎芷珊主持《童你一起長大了》令唔少網民批評佢嘅做法，近日蓋世寶接受《1圈圈星光背後》訪問時解釋，係因為王祖藍一通電話，指節目概念會搵晒每一代每一個主持返去，蓋世寶覺得好有意思加上認為自己做咗咁多年都應該要返去，所以連酬勞都無傾就應承咗。

不過，蓋世寶直言節目開拍後與洽談時有出入，貨不對辦令佢相當不滿：「我真係反晒眼。」原來節目並唔係好似當初咁講集結全部昔日主持，只係部份主持被邀請上節目，而且仲跳過咗《放學ICU》，基於專業操守，蓋世寶就話當時個心幾唔舒服都要繼續做落去：「我相信搵我返去最大作用只係幫個節目宣傳， 佢應該係咁計嘅，佢哋咁識計數﹗」而被問到有冇同王祖藍反映，佢就表示癟冇講，亦明白對方好難做：「佢負責交橋之嘛，啲人事又關佢事，我惟有盡量配合囉﹗」不過，蓋世寶坦言與TVB再合作機會相當微。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！