政情：蒙兆達接任職工盟總幹事
本港三大工會之一嘅職工盟將於七月一日正式換班！喺勞工界近三十年、做咗十四年總幹事嘅李卓人老婆鄧燕娥舊年年底辭職後，職工盟就首次公開招聘總幹事，遴選委員會喺五名應徵者中，終於決定由現職統籌幹事嘅蒙兆達接任，佢喺職工盟做咗十五年。
蒙兆達九五年大學畢業後就加入職工盟，期間有兩年去咗英國進修讀咗個同勞工有關嘅碩士學位，佢話能夠做到總幹事都好開心，最希望係喺有生之年爭取到標準工時同集體談判權立法。
至於娥姐，佢會喺六月初最後以職工盟總幹事身份出席喺日內瓦舉行嘅國際勞工大會，六月底正式離任。
其實職工盟今次第一次公開招聘總幹事，都吸引唔少人寄信嚟應徵，遴選委員會成員之一嘅李建賢透露，五名候選人中除咗蒙兆達係有工會背景外，其餘四個都係外界，有個有豐富嘅商界經驗，有啲就主責做行政工作，但全部欠缺參與社會運動同涉及勞工等社會政策，以蒙兆達嘅經驗同背景，大熱跑出係理所當然。