今朝一入電梯就撞到菲姐.佢著住校服,擔住支煙,冇帶書包.
[唔好食禁多啦]
[你究竟係驚我影衰屯天定係關心我?]
[你話呢]
[你話過著住校服唔好食,你話過響出面做乜都好,著左校服就做番個學生]
[我都有話過keep住食好難斷尾,成日想去訓]
[尤得我啦]
出到大閘,佢企左響度,同我講
[我唔記得左帶con!]
[你都幾好野喎..出左門口禁耐先記得]
會考26分同食唔食煙,有乜關系?
番學勤力,放學換左衫去溝仔,冇衝突
有人話咁樣係虛偽..
你會響屋企發卑四,但響學校被評為品學兼優;
你會響屋企好乖,出到去同班friend口沬遮攔;
你會響條仔面前好純,響班friend面前D口水可以入滿條東江;
有個陌生人撞到你,你會脾住佢,有個friend撞到你,你唔會.
咁樣係虛偽?
大家都知道每個人都有好多面,係唔肯認自己都有.
電映入面,D乜野大佬入到靈堂都比番些少薄面,尊重,有乜事都出到去先攪.
電映反映o既,正正係呢一種,唔同場合有唔同表現,響唔適當o既時候盡可能唔做唔適當o既野,呢一種人o既本質.唔係虛偽,係尊重.
點解我會叫D思想比較成熟,但對出面個世界唔太清楚o既人要識埋"壞"人?
你讀書讀得好,好有條件升上去,後來比你出到去社會,又點呢?
學校同社會係兩回事.
學校讀倒書就係有用,有Reference,有notes教你點樣變有用(讀倒書);
出到去生存到先叫有用,冇Reference,冇notes教你點樣變有用(生存倒).
你估下比你做到博士,月入10幾萬,又點?比你做埋特首,又點?咪又係一個董建華.
成日話為市民著想,連班小市民每日係點過都唔知,未捱過點知咩叫捱?
對個世界一無所知,做人正直,非黑即白,你估下出到去社會,除左教書之外,仲做到D咩?
你做人正直唔代表A個世界個個都正直;
你唔玩人唔代表人地唔會玩你,連人地會點玩你都唔知,你點同人玩?
我地做人要對人好,但都要知道當人地對你唔好o既時候,你要點做.
正如,識講粗口唔代表你要講,但連粗口係乜都唔知,你同班高官一樣,月入10幾萬,但乜都做唔到,因為對個世界一無所知.
社工要幫邊緣少年,佢地要成功,就要知邊緣少年諗乜同做乜;
差佬要捉人,要成功,就要知班人諗乜同做乜;
高官要成功,就要知班小市民諗乜同做乜;
讀完一大堆理論,出到去先知原來係兩回事,重頭學過,你唔係傻仔,係咩?
你估下同邊緣少年講做人道理有冇用?
又估下差佬同班賊講道理有冇用?
點解果位吸過毒o既牧師比普通牧師成功?
佢救到班壞人行番正路,但普通牧師好多時連普通人都救唔到?
我o既意思唔係話要吸過毒先成功,而係要証明,對個世界知多少少,接觸過"壞"人,先會係比較成功.
我自己唔甘心讀完13年書之後,出到去先知,我要重頭學過一切先知點可以生存.
用果13年,讀書兼睇清楚個世界.
既然接觸過"壞"人,先會係比較成功,咁點解淨係同思想比較成熟o既人講要接觸"壞"人?
我同個7歲小朋友講,你要知乜野係粗口,佢去學,學完後佢會日日xyz我;
我同個18歲朋友講,你要知乜野係粗口,佢知左,曉得思考,但唔會講.
身為人師o既睇完,可能覺得係荒謬.
你教班小朋友做人正直,但你又唔可以否認做人每一刻都正直係生存唔到.
識諗野o既,睇完係唔會有咩反應.
多謝菲姐今朝禁o岩響7:20出門口,若果撞唔到你,就冇A篇野.
用口語寫係好難有說服力,但用口語寫有藽切感,有藽切感某程度上係有說服力,
我只係響說服力同藽切感之間衡量過.
若果書面語係"好";口語係"壞",
我用口語唔代表我"壞",我只係響"好"同"壞"之間衡量過,發覺響A個情況之下,"壞"比"好"好好多.
若果,做壞事=壞人;做好事=好人,咁阿甲殺左阿乙阿媽,阿乙孝順,不惜去殺左阿甲阿媽,阿乙係好人定壞人?
若果你有權決定阿乙係壞人定好人,咁A個世界就冇法官啦...
2004/6/17
文章定位：
