政Whats噏:葉子祈唔戴口罩 西貢區議會上爆口角|即時新聞|港澳|on.cc東網

政Whats噏:葉子祈唔戴口罩 西貢區議會上爆口角

2020年09月09日 16:44
東網電視
更多新聞短片
葉子祈(右)開會期間唔戴口罩。
疫情下每個人都做足防禦措施,口罩都時刻戴住,如非必要都唔會除下,但尋日(8日)舉行嘅西貢區議會會議中,區議員葉子祈就竟然唔戴口罩,其他在席議員睇唔過眼,要求佢戴返,但點知雙方就因此發生口角,爆發一輪罵戰。
西貢區議會地區設施管理委員會尋日召開今年第二次會議,會議一開始主席黎銘澤就講明,開會期間各位議員盡量唔好飲食同埋要戴口罩,而作為副主席嘅葉子祈本來都有戴住口罩,但點知其後就無故除下。
直至葉要求發言時,議員陳耀初就實在按捺不住,要求主席叫一旁嘅葉戴返口罩先好發言,如果唔戴,為保護自己佢會選擇離場,葉隨即反唇相譏,話陳咁驚就好快啲離開,指陳年逾半百屬於高危一族,年長嘅人一旦染疫致命率係特別高咁話。
議員陸平才聽到咁,即刻火爆指住葉子祈要求佢離場,仲要佢收番「老人係要去死」呢句說話,認為對方歧視上咗年紀嘅人,但葉子祈不但唔收番,仲引用衞生署數據,堅持年長嘅死亡率較高,激到陸平才離場抗議。其實呢段時間,大家真係應該自覺,時刻戴住口罩先至啱,因為口罩起口角就真係無謂啦。