歷久「嚐」新五十載

飲食文化往往能反映一個地方嘅變遷，早於五十年代，茶樓、冰室、茶餐廳、大牌檔等食肆林立；其後隨住代工業加速發展，大批男女出外工作，為解決午餐問題，包伙食大行其道。直至七十年代，本港經濟核心逐步由製造業轉移向金融和專業服務業，工作節奏更趨急促，標榜「快靚正」嘅快餐文化逐漸形成。
我自一九七三年大學畢業後，半世紀嘅工作生涯都圍繞中環，第一份工喺中環舊滙豐總行返工，當時首間美心快餐選址中環皇后大道中，三蚊一盒飯、幾毫子一隻炸雞髀，紅綠格仔形象深入民心，係唔少白領嘅午膳飯堂，甚至有時搭的士去中環講舊美心有落，司機都知道邊度。時至今日，美心快餐屹立半百載，成功跨過九七金融風暴、○三年沙士，以至新冠疫情等難關，相信絕非僅憑僥倖二字。最近我同美心集團快餐總監范滿強（Thomas）傾偈，由歷史講到今日新口味。

美心集團快餐總監范滿強（右）。

創業容易守業難，尤其餐飲業市場競爭激烈，快餐店要做到歷久不衰，除了講求出餐速度，更要迎合市場口味。美心快餐在二○二一年升級為速食概念品牌美心MX，重新設計室內環境，以大地色為主調，加上綠色植物點綴，帶出咖啡室嘅悠閒感覺。餐單方面，除咗主打燒味，亦積極引入異國口味食品和時令食材，務求提高食客嘅新鮮感和回頭率。
上年第五波疫情一觸即發，三月單日確診一度升穿五萬五千宗，無疑係餐飲業最黑暗時期。Thomas憶述，當時陸續有前線員工染疫或成為密切接觸者須隔離，三分一分店需要暫時停業，營業額難免受影響，但為令員工安心，集團仍向員工加薪，以激勵士氣。另外，面對晚市禁堂食，管理層亦靈活變陣，如將晚市時段提早至五時開始，同時提供特價外賣小菜，促使外賣生意倍增。
跨過疫情高峰後，堂食人數和時間得以放寬，加上中港通關，近月餐飲業人手需求持續增加。Thomas坦言，由上而下嘅管理方式已不合時宜，聆聽和溝通至能留住人心。而為紓緩樓面和收銀壓力，分店逐步應用收盤機械人、手機點餐程式或kiosk，令服務效率得以提高。
近年商界環保意識抬頭，餐飲業亦紛紛加入減碳行列。據素食公司Green Monday最新調查，全港有逾二百五十萬人有素食習慣，而有見於素食文化漸趨普遍，美心MX亦順勢推出植物肉系列選擇，以滿足市場所需，同時宣揚可持續飲食。
除了推動綠色飲食，絕「膠」亦係重要一環。Thomas指，旗下全線快餐堂食已改用可重用餐具，早前適逢五十周年金禧，更特別訂造一批金色可重用餐具，供顧客以優惠價換購，既做到走塑，又可滿足客人用餐體驗。另外，前線員工嘅新制服，特別加入再造聚酯纖維，意味每件Tee恤重用咗約七個回收膠樽，確有創意又環保。