忽然辭職唔尋常 康諾恩返英國幫馬斐森！？

港大管理層再爆離職潮，繼副校長（環球事務）高為元去年底請辭後，任職六年嘅行政及財務副校長康諾恩，同埋副校長（研究）賀子森都遞信 ，請辭原因話就話係「私人理由」，但兩人咁蹺未完約就提早走，其中康副校更加提早近四年解約，背後原因盛傳同前校長馬斐森有關。
有港大消息人士透露，康諾恩喺校內人緣頗佳，每逢師生有投訴，佢都願意聽。不過年前佢大刀闊斧整頓校園膳食商，將部分餐廳以單一招標方式判出，就惹來怨聲載道。有教職員慨歎新安排後「選擇少咗」、「味道差咗」、「價格貴」，直言「短短幾個月間有成幾百宗投訴。」
一波未平，體重有番咁上吓嘅康諾恩，近年受腰痛困擾，要定期去做按摩。有教職員同本刊講，曾喺南丫島撞見康副校幾次，「佢話去搵一個阿嬸幫佢按摩，按完無咁痛。」未知係咪因為咁，兩個月前開始傳出佢有意返英國去愛丁堡大學幫做緊校長嘅馬斐森手，不過康副校一直未有動靜。

港大校長張翔上任僅一年，先後有半數副校長請辭。

康諾恩同前港大校長馬斐森老友鬼鬼，未知今次返回英國會否幫對方手？

如果成事，相信最開心係馬斐森。事關馬、康兩人情如沙煲兄弟，兩個都係蘇格蘭人，彼此嘅太太又係牙醫，同聲同氣好正常。有消息人士話，自從馬斐森一四年上場後，康諾恩就猶如「大內總管」，「除學術外，人事、會計、資訊科技、大學醫療健康服務、圖書館以至校園膳食都係佢睇晒。」難怪有教職員形容佢忙到分身不暇。
早前有舊生反映校內體育館嘅新泊車收費制度有問題，康副校聽完從善如流馬上改，舊年佢再獲續約，師生都無異議。人氣咁高都要走，莫非真係同整頓膳食商風波有關？港大發言人回覆話，留意到新膳食供應商喺合約初期提供嘅服務未如理想，已經改緊。至於康曾建議將一籃子合共十所餐飲以統一合約形式招標，發言人話係旨在讓外判商可平衡營運成本，強調決策過程公平、公正咁話。
康副校走得突然，同樣提早七個月走嘅副校賀子森都令師生愕然。生於香港嘅賀子森年前由新加坡來港坐鎮港大，盛傳佢太太都陪伴左右，似乎預咗留港一段時間，????家提早走，有老師揣測可能同港大學術排名未有太大突破有關。
國際高等教育資訊機構Quacquarelli Symonds（QS）前排公布最新世界大學排名，雖然港大排名維持第廿五位，但其餘四間大學好似科大、中大、城大同理大，排名都有上升。最令人擔心係，港大牙科自一六年連續三年排名全球第一後，今年竟然跌出三甲，降至第四位。有消息人士分析道：「賀子森專責睇研究，唔排除因為咁承受一定壓力！」

提早七個月離任嘅賀子森將重返新加坡發展。