苗可秀恨演巴辣潑婦講粗口

早於七十年代紅遍電影圈、曾多次與李小龍演銀幕情侶的「嘉禾公主」苗可秀（Nora）近年回流返港，以玩票性質客串過幾齣電影的她坦言仍未夠喉，難止戲癮：「我咩嘢角色都想嘗試吓，因為後生時就係做少女多，依家呢個年紀唔同角色都想試吓。」除了鬼古外，她想挑戰巴辣潑婦角色：「之前未試過嘛！（可以辣成點？）咁要睇吓個劇本點喇！」問到是否能夠為角色破戒爆粗？她即笑說：「得！想唔想依家聽吓？（但你平時應該唔講喎！）你唔知咋！嬲起上嚟都會！」

唔拍床上戲

非常風趣的她又繼續說：「污糟邋遢嘅角色都唔錯呀！（唔介意？）咁先好，唔使成日在意個妝呀！」不過，她自言對床上戲耍手擰頭：「睇都睇後生拍啦！（打戲呢？）唔係太劇烈就得，最好咪啦！都冇說服力啦！警匪片開吓槍、武俠片飛嚟飛去都得嘅！」

創一番事業

談到回流，Nora坦言想在事業上再有一番成績：「之前拍吓停吓，但聽到好多朋友嘅鼓勵，話返嚟再玩吓、好多年可以做咁。（習慣番香港生活？）喺外國住咗咁多年，但係香港始終係自己地方，唔會唔慣。」早前李小龍75歲冥壽，她表示獲邀出席紀念活動：「李小龍影迷會搞咗個聚會，日本嘅會長都嚟咗，我係第一次出席，大家好開心，場面好熱鬧，影吓相、簽吓名。」

談到有網民發現年輕時的她與韓國人氣女團少女時代成員Yoon A有幾分相似，她雖然不太認同，但非常受落，並笑說：「樣唔係好似啫！可能又係面長長、長頭髮先有人覺得似！不過梗係開心啦！有靚女似我喎！」