之前食過沙田萬怡嗰間momo cafe,覺得幾好食,但係無位,所以就揀港島區呢間。一坐落見到枱頭個糖盅勁污糟無抹,嗌個侍應嚟換過個。環境勁似staff canteen😂,每人得一張大餐巾同一張濕紙巾,但係沙田嗰間佢係每張枱都有海量餐巾仼你用😂 食物又無咩食,啲嘢食又唔掂,啲咖啡杯崩嘅都照俾人用,啲碟個pattern又樣衰...,好似甩色咁樣。一開頭完全無侍應收碟(沙田嗰間啲侍應係好勤力幫你收碟),佢收碟又死都唔收杯,之後攪到一枱都係杯,最後佢無杯用,竟然攞條紙杯出嚟派😂😂😂😂😂 凍海鮮方面,種類少,得蜆、蝦同螺,超難食,仲難食過Cordis,呢間仲要蠔都無隻。刺身得嗰4款:三文魚、吞拿魚、北寄貝同紅綢魚,正正常常,無話好唔好。中湯同西湯正正常常,飲得落口。廚房嗰邊,得一個廚師,負責曬切牛扒、夾魚、夾海南雞同淥麵,又姑寒,魚又俾得一嚿,佢夾俾我嗰嚿雞係頸位嚟,完全無嘢食😂麵嗰方面,佢得叻沙湯底,得油麵。但係沙田間momo係 又有得揀要咩麵底,要咩餸,要咩湯底,呢度一係要一係唔要。佢仲要點心都無籠😒檸檬片就算有個微波爐蓋冚住都乾曬,仲要切到歪晒,好心佢就訂啲切片檸檬嚟派啦😂 甜品方面,佢係無一隻完整嘅蛋糕,有芝士蛋糕、泡芙同窩夫。芝士蛋糕同泡芙唔知仲乜鬼嘢,每樣都要整啲士多啤梨醬喺上面揈線同埋加啲彩針上去,窩夫就落得太多泡打粉,有啲苦。綠豆沙雖然都食得過,但係佢側邊係完全冇碗擺喺度,唔知攞咩裝😂西瓜蜜瓜同菠蘿就吹到乾晒個面。Movenpick雪糕我就唔係太吼,因為我覺得真係好甜,同埋佢嗰度係一大桶你自己𢳂,沙田嗰間佢係一杯杯。佢凍飲就係得雜果賓治、凍檸茶同埋排毒美顏水,凍檸茶就係嗰啲冇檸檬片嘅檸檬茶,前兩者都係好甜。 佢啲嘢個擺位真係超級奇怪,佢係凍飲、熱食同埋日式嘢擺埋同一度😂😂😂嘢飲又分開凍飲同熱飲😂廁所又只係得一格男廁、一格女廁、一格殘廁。 總括嚟講,呢間嘢真係完全唔建議幫襯,我諗任何一間自助餐都好過佢,因為佢真係好難食,又冇咩好食,又冇乜侍應,唔怪得知沙田嗰間momo冇位,但係呢間會有位,同時亦都證明咗點解佢就算入曬座,都仲有好多吉枱冇人坐。更多